काठमाडौं । चितवनको सिमलतालमा भएको बस दुर्घटनाको अध्ययन गर्न गठित कार्यदलले सरकारलाई प्रतिवेदन बुझाएको छ । मंगलबार सिंहदरबारमा गृहमन्त्री रमेश लेखकलाई अध्ययन प्रतिवेदन बुझाइएको हो ।

गएको असार २८ गते पहिरोमा परी चितवनको सिमलतालबाट दुई बससहित यात्रु त्रिशूली नदीमा खसेका थिए । बस र यात्रु नदीमा बेपत्ता भएपछि दुर्घटनाको अध्ययन गर्न गृहका सहसचिव छवि रिजालको संयोजकत्वमा कार्यदल गठन गरिएको थियो । रिजालले गृहमन्त्रीलाई प्रतिवेदन बुझाएका हुन् ।

दुर्घटनास्थलमा कमजोर भूगोल तथा अत्यधिक ‘क्रस स्लोप’ भएको देखिएको प्रतिवेदनमा उल्लेख छ । त्यहाँ कुनै टेवा पर्खाल नभएको र ‘क्रस’ गर्दै गएका दुई बसलाई पहिरोले धकेलेर त्रिशूलीमा खसालेको देखिएको संयोजक रिजालले बताए ।

यस्तै, दुर्घटनास्थलभन्दा माथिल्लो भेगमा ग्रामीण सडक निर्माण गर्दा समग्र वातावरणीय विषयमा ध्यान नदिइएको र त्यसको प्रभाव तल्लो क्षेत्रमा परेको समेत देखिएको उनले जानकारी दिए ।

दुर्घटनामा बाँच्न सफल व्यक्ति, प्रत्यक्षदर्शी, सडक विभाग, चितवन जिल्ला प्रशासन कार्यालयलगायत निकायका अधिकारीसँग अध्ययनका क्रममा छलफल गरिएको रिजालले बताए । सडक दुर्घटनामा ज्यान गएकाका परिवारलाई उचित क्षतिपूर्ति र बिमाबापतको रकम दिन ढिलाइ गर्न नहुनेमा उनले जोड दिए ।

अध्ययन प्रतिवेदन बुझ्दै गृहमन्त्री लेखकले दुर्घटनामा परेका अझै अधिकांश व्यक्ति फेला नपर्नु दुःखद भएको बताए । आउँदा दिनमा दुर्घटना न्यूनीकरण गर्न सरकारले आवश्यक नीति बनाउने उनले उल्लेख गरे । उनले कार्यदलले दिएको प्रतिवेदनलाई कार्यान्वयन गर्ने प्रतिबद्धता जनाए ।

असार २८ गते काठमाडौंबाट गौरतर्फ जाँदै गरेको र वीरगन्जबाट काठमाडौंतिर आइरहेको दुई बस र यात्रु नारायणगढ–मुग्लिन सडकखण्डको सिमलतालमा पहिरोमा परी त्रिशूली नदीमा खसेका थिए । २४ यात्रुको शव फेला परिसकेको छ । तीमध्ये १९ जनाको मात्र सनाखत भएको छ । दुई बससहित अझै कम्तीमा ३८ यात्रु बेपत्ता छन् । हिमालयन टेली भ्वाइस