काठमाडौं । जनता समाजवादी पार्टी, नेपालका अध्यक्ष उपेन्द्र यादवले नेपाली कांग्रेस र नेकपा (एमाले) मिलेर समानुपातिक प्रतिनिधित्व प्रणाली खारेज गर्ने षड्यन्त्र गरेको आरोप लगाएका छन् । शनिबार काठमाडौंमा पार्टी प्रवेश कार्यक्रममा उनले समावेशिता अन्त्य गर्न कांग्रेस–एमाले मिलेर सरकार बनाएको आरोप समेत लगाए ।

नेपालको अहिलेसम्मका आन्दोलनको ठूलो उपलब्धि समावेशिता भएको उनले उल्लेख गरे । उनले राज्यकै तर्फबाट अहिले समावेशी लोकतन्त्रमाथि प्रहार भइरहेको जिकिर गरे । दलहरूका कारण मुलुकमा राजनीतिक अस्थिरता उत्पन्न भएको उनको भनाइ थियो ।

उनले समावेशितासहितको लोकतन्त्रलाई हटाएर राजनीतिक स्थिरता खोज्न नहुनेमा जोड दिए । पद र पैसाको लोभमा नेकपा (माओवादी केन्द्र) र एमाले मिलेर यसअघि आफ्नो पार्टी फुटाएको आरोप पनि उनले लगाए । हिमालयन टेली भ्वाइस