काठमाडौं । गृहमन्त्री रमेश लेखकले डीआईजी मनोज केसीको सरुवालाई सामान्य प्रक्रियाका रूपमा लिन आग्रह गरेका छन् । राष्ट्रियसभाअन्तर्गतको विकास, आर्थिक मामिला तथा सुशासन समितिको बैठकमा बिहीबार उनले यस्तो आग्रह गरेका हुन् ।

बैठकमा नेकपा (एकीकृत समाजवादी)का सांसद घनश्याम रिजालले केसीको नाम उल्लेख नगरी दुई महिना नपुग्दै डीआईजीको किन सरुवा गरिएको ? भन्ने प्रश्न गरेका थिए । त्यसपछि उनले यस्तो जवाफ दिएका हुन् ।

कर्मचारीको सरुवा, बढुवा नियमित प्रक्रिया भएको भन्दै उनले डीआईजी केसीलाई ‘उपयुक्त’ ठाउँमा लगिएको बताए । केसी योग्य व्यक्ति भएको र प्रहरीलाई तालिम दिने स्थानमा लगिएको उनको भनाइ थियो ।

सरुवा गरेर उनको ठाउँमा डीआईजी नै ल्याइएको भन्दै उनले यसलाई सामान्य प्रक्रियाका रूपमा लिन आग्रह गरे ।

गृहमन्त्री रमेश लेखकको भनाइ पढ्नोस्–
सरुवाको कुरा भन्नुभयो, कर्मचारीको सरुवा हुन्छ, बढुवा पनि हुन्छ । निरन्तरको प्रक्रिया हो । सामान्यतया अवधि तोकेको हुन्छ, यति अवधिपछि हुन्छ है भनेर । तर, कहिलेकाहीँ अवधिभन्दा पहिला पनि हुन्छ । जहाँसम्म यहाँले जुन पदको सरुवाको कुरा गर्नुभएको छ, उहाँ अत्यन्त योग्य मानिस हो र योग्यतम ठाउँमा पुग्नुभएको छ । किनभने, प्रहरीलाई तालिम दिने ठाउँ भनेको त सबैभन्दा ज्यादा पढेलेखेको मान्छे चाहियो नि ! प्रहरी राम्रो बनाउनुपर्‍यो । अनि, राम्रो प्रहरीलाई राम्रो तालिम दिनका लागि राम्रो मान्छे पठाउँदा के समस्या भयो ? अनि, फेरि जुन ठाउँबाट उहाँ जानुभयो, डीआईजी गएर इन्सपेक्टर त आएको होइन होला नि ! अर्को डीआईजी आएको होला नि ! त्यसो भएको हुनाले यसलाई सामान्य प्रक्रियाका रूपमा लिइदिनुहुन म हात जोडेर प्रार्थना गर्छु । न्युज एजेन्सी नेपाल