काठमाडौं । राष्ट्रिय योजना आयोगका नवनियुक्त उपाध्यक्ष प्रा. डा. शिवराज अधिकारीले पद तथा गोपनीयताको शपथ लिएका छन् ।

शुक्रबार प्रधानमन्त्री केपी शर्मा ओलीसमक्ष पद तथा गोपनीयताको शपथ लिएका हुन् ।

प्रधानमन्त्री तथा मन्त्रिपरिषद्को कार्यालयमा आयोजित समारोहमा उनले शपथ लिएका हुन् । त्रिभुवन विश्वविद्यालयका प्राध्यापक समेत रहेका  डा अधिकारी बिहीबार उपाध्यक्षमा नियुक्त भएका थिए ।

साथै, उपाध्यक्ष अधिकारीसमक्ष आजै आयोगका नवनियुक्त सदस्यहरू डा आरपी बिच्छा, डा. रमेशप्रसाद सिंह, डा. प्रकाशकुमार श्रेष्ठ, गीताकुमारी पौडेल अधिकारी, डा. जयबहादुर टण्डनले पनि पद तथा गोपनीयताको शपथ लिएका छन् । आजको शपथमा आयोगका नवनियुक्त सदस्य गंगादत्त अवस्थी भने अनुपस्थित थिए ।

त्यस अवसरमा उपप्रधानमन्त्रीहरू, मन्त्रीह, प्रधानमन्त्रीका सल्लाहकार मुख्यसचिवलगायतका व्यक्तित्वको उपस्थिति थियो ।