![बीवाईडीले काठमाडौं र ललितपुरमा एकैदिन उद्घाटन गर्यो दुई अत्याधुनिक सर्भिस सेन्टर](https://12khari.top/uploads/posts/byd-1721982795.jpg)
काठमाडौं । विद्युतीय सवारी निर्माता बीवाईडीले काठमाडौं र ललितपुरमा एकै दिन नयाँ सर्भिस सेन्टर सञ्चालनमा ल्याएको छ । काठमाडौंको गुह्येश्वरी र ललितपुरको कुपण्डोलमा कम्पनीले शुक्रबार सर्भिस सेन्टरको उद्घाटन गरेको हो ।
दुवै ठाउँका यी सर्भिस सेन्टरलाई बीवाईडीले ‘सुपेरियर र सिन्सियर सर्भिस’ दिने आफ्नो प्रतिवद्धतातर्फको थप प्रयास भएको बताएको छ ।
सर्भिस सेन्टर उद्घाटन कार्यक्रममा बीवाईडी नेपालको आधिकारिक वितरक साइमेक्स इंकका सीईओ साहिल श्रेष्ठले सर्भिस सेन्टरलाई अत्याधुनिक बनाउन खोजेको बताएका छन् ।
“हामीले वनस्टप सोलुसनका रूपमा एकै ठाउँबाट सर्भिसिङसँगै बिक्री र अन्य सेवा दिन खोजिरहेका छौँ । हामीले हाम्रा सर्भिस सेन्टरबाट एक महिनामा ५० वटा गाडी डेलिभर गरेका छौँ,” साइमेक्सका सीईओ श्रेष्ठले भने ।
बीवाईडीले टायर र गाडीको सिसाबाहेक ब्याट्री, मोटर सबै आफ्नो उत्पादन गर्ने हुँदा विश्वमै ठूलो र अत्याधुनिक ईभी उत्पादक बन्दै गएको उनको भनाइ छ ।
त्यसैले सन् १९९५ मा स्थापित कम्पनीले छोटो समयमै ८० लाख गाडी बिक्री गर्न सफल भएको उनले बताए ।
इकोड्राइभ अटोमोबाइल्सका प्रमुख प्रकाश तुलाधरले सर्भिस सेन्टरको स्थापनासँगै सेवा थप सहज बन्दै गएको बताए ।
साइमेक्स इंकका प्रमुख अनिल श्रेष्ठ र बीवाईडीको एसिया प्यासिफिक अटो सेल्स डिभिजनका जनरल म्यानेजर लिउ जुलियाङलगायतले सर्भिस सेन्टरको उद्घाटन गरेका थिए ।