![उज्वेकिस्तानविरुद्ध स्पेनको जित, अमेरिकामाथि फ्रान्स हाबी](https://12khari.top/uploads/posts/wefasg-1721889750.jpg)
काठमाडौं । पेरिस ओलम्पिक–२०२४ को पुरुष फुटबलमा स्पेनले उज्वेकिस्तानविरुद्ध २–१ को जित निकालेको छ । बुधबार फ्रान्समा भएको खेलमा स्पेनलाई जित दिलाउन मार्क पबिल र सर्जिओ गोमेजले गोल गरे । उज्वेकिस्तानका एल्डोर सोमुरोडोभले एक गोल फर्काएका थिए ।
खेलको २९औँ मिनेटमा पबिलले गोल गर्दै स्पेनलाई अग्रतामा राखेका थिए । तर, पहिलो हाफको इन्ज्युरी समयमा सोमुरोडोभको गोलमा उज्वेकिस्तान खेलमा फर्कियो ।
६२औँ मिनेटमा गोमेजले गोल गर्दै स्पेनलाई पुनः २–१ को अग्रतामा राखेका थिए । यही गोल निर्णायक बन्दा स्पेनले प्रतियोगितामा विजयी सुरुआत गरेको हो ।
प्रतियोगिताको पुरुष फुटबलतर्फ स्पेन समूह ‘सी’मा छ । यो समूहमा स्पेन र उज्वेकिस्तानसँगै इजिप्ट र डोमिनिक रिपब्लिक छन् ।
बुधबार नै भएको अर्को खेलमा फ्रान्सले अमेरिकाविरुद्ध ३–० को सहज जित निकाल्यो । फ्रान्सलाई जित दिलाउन एलेसान्ड्रर लाकाजेट्टी, माइकल ओलिसे र लोइक बाडेले गोल गरे ।
ओलम्पिकअन्तर्गत पुरुष फुटबलमा फ्रान्स समूह ‘ए’मा छ । यो समूहमा फ्रान्स र अमेरिकासँगै न्युजिल्यान्ड र गुयना छन् ।