काठमाडौं । संसदीय समिति बैठकमा सांसदहरू नियमित रूपमा उपस्थित नभएपछि उद्योग तथा वाणिज्य र श्रम तथा उपभोक्ता हित समितिले कडाइ गर्ने भएको छ ।

बुधबार प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकले बैठकमा कुन सांसद कति पटक सहभागिता जनाएको विषयमा तथ्यांक सार्वजनिक गर्न सचिवालयलाई निर्देशन गरेको छ । संसदीय समिति बैठकहरूमा सांसदहरूको उपस्थिति कमी हुने गरेकाले बैठकमा उपस्थिति सार्वजनिक गरी कडाइ गर्न थालिएको बताइएको छ । 

बैठकमा समिति सभापति अब्दुल खानले ३७ वटा समिति बैठकमा कुन सांसद कति पटक सहभागिता जनाएको हो, त्यसको तथ्यांक सार्वजनिक गर्न सचिवालयलाई निर्देशन दिए । उनले पछिल्लो समय समितिमा धेरै विधेयकहरूको विषयमा छलफल गर्नुपर्ने भए पनि सांसदहरूको उपस्थिति कमजोर रहेकाले बैठकमा सहभागिता भएको तथ्यांक सार्वजनिक गरिने बताए । 

समिति बैठकमा सांसदहरुको सहभागितालाई नियमित गराउनको लागि ३७ बैठकमा कुन सांसद कतिवटा बैठकमा सहभागिता भएको तथ्यांक सचिवालयको वेबसाइटमा सार्वजनिक गर्न सचिवालयलाई निर्देशन गरे ।  

"अहिलेसम्मका समिति बैठकमा कुन सदस्य कति बैठकमा सहभागिता जनाएका छन् त्यसको सूची निकाल्नु पर्‍यो । उक्त सूची वेबसाइटमा राख्न समिति सचिवालयलाई निर्देशन दिन्छु । समितिको ३७ वटा बैठक भएको छ । त्यसमा कुन सांंसद कति वटा बैठकमा सहभागिता हुनु भएको छ । त्यो तथ्यांक निकाल्नलाई सचिवालयलाई निर्देशन गर्दछु," उनले भने ।