काठमाडौं । प्रधानमन्त्री केपी शर्मा ओलीले डेडिकेटेड तथा ट्रंकलाइन विवादमा नौ वर्ष अघिदेखिको महसुल प्रधानमन्त्रीले नउठाऊ भनेको जस्तो भाष्य निर्माण गर्न खोज्नु गलत भएको बताएका छन् ।  

विश्वासको मत लिनुअघि सदनमा उठेका प्रश्नको जवाफ दिँदै ओलीले डेडिकेटेड तथा ट्रंकलाइनमा नौ वर्षदेखि महसुल लिनुपर्छ कि पर्दैन अथवा तिर्नुपर्छ वा पर्दैन भन्ने विवाद रहेको र पटक–पटक लाइन काटिँदै र जोडिँदै आएको विषय रहेको स्मरण गराए । 

नेपाल विद्युत् प्राधिकरणले धेरै उद्योगको बक्यौता रहेपनि ६ वटा मात्रै उद्योगको लाइन काटेको र अन्यको किन नकाटेको भन्दै उनले प्रश्न गरे । “उद्यमीहरूले पैसा तिर्दिनँ भनेको छैन, हामी जति प्रयोग गरेको हो त्यति तिर्छौं भनेका छन्”, उनले प्रश्न गरे, “यसमा  सरकारले बिल दिनुपर्छ । तर तिमी धनी छौ, तिमीसँग यति असुल गर्न मन छ । यति मलाइ चाहिन्छ भनेर हुन्छ ?”

ओलीले प्राधिकरणले डेडिकेटेड तथा ट्रंकलाइन मात्रै भनेको तर विद्युत् सप्लाई नभएको भन्ने आरोप रहेको बताए ।

“डेडिकेटेड तथा ट्रंकलाइन भनेको तार जोड्ने होइन । यसमा बिजुली सप्लाई हुनुपर्छ । २४ घण्टा बिजुली सप्लाई भनेको छ, लोडसेडिङ लगाइदिएको छ”, उनले भने, “केही घण्टा विद्युत् पाएको छ, केही घण्टा पाएको छैन भन्ने विवाद छ ।”

सदनमा प्रधानमन्त्रीले जंगबहादुर शैलीमा हुकुम दिएको माओवादी नेता माधव सापकोटाले आरोप लगाएपछि ओलीले उद्योग चलाएर मात्रै मजदुरले काम पाउने बताए । उद्योगीले पैसा तिर्न सक्ने भएकाले लाइन जोडेर विवाद समाधान गर्नुपर्ने बताए ।  

“मैले लाइन जोडेर समाधान खोजौँ भनेको हो,” ओलीले भने, “मैले प्राधिकरणका एमडी, ऊर्जामन्त्री, सचिव र उद्यमीहरूलाई राखेर कुरा गरेँ । उहाँको जवाफ मैले पाइसकेँ । हिसाव सोधिसकेँ । संसदीय समितिमा पठाइसकेँ । अब हिसाब कहाँ फेर्न मिल्छ ?” 

उद्योग बन्द गराएर मजदुरहरूले काम नपाउने उनको भनाइ छ । निर्यात रोकिएपछि बजार खोसिनेतर्फ आफू सचेत रहेको उनको भनाइ छ । 

ओलीले गलत हिसाब पठाएर फेर्न नमिल्दैन भन्दै तिर्न नपर्ने महसुल असुल गर्न नमिल्ने बताए ।

उद्यमी व्यवसायीहरूले प्रयोग गरेको महसुल तिर्ने तर प्रयोग नै नगरेको नतिर्ने भनेकाले यसको छानबिन गर्नुपर्ने ओलीको भनाइ छ । 

“यहाँ उद्यमी र प्राधिकरणको बीचमा ठूलो मतान्तर देखियो । उद्योग बन्द गरेर पैसा आउँदैन । उद्योग खोल्न दिउँ, लिनुपर्ने पैसा लिउँ,” प्रधानमन्त्री ओलीले भने ।

“मैले लाइन जोड्नुसभन्दा कुलमानले बोर्ड बैठक बसेर खोल्नुपर्छ भने । बोर्ड बैठकमा सञ्चालक समितिले तपाईंले लाइन काटेको तपाईं नै खोल्नुहोस्, यसअघि काट्ने निर्णय बोर्डको होइन भन्ने कुरा आयो,” ओलीले भने ।

उद्योगीहरूले प्रयोग गरेको विद्युत् महसुल लिनुपर्ने तर उद्योग बन्द गर्न नहुनेमा उनको जोड छ । 

“पैसा असुल गर्नुपर्छ तर उद्योग बन्द गर्न हुँदैन । नौ वर्षअघिको विवादमा अहिले आएर उद्योग बन्द गर्ने ?”, ओलीले भने, “यसको छिनोफानो हुनुपर्छ । प्रधानमन्त्रीले उद्योगीले प्रयोग गरेको पैसा नउठाउँ भनेको छैन । विवाद हुँदा विद्युत् खेर गइरहेको छ । टर्वाइन बन्द भएको छ । यता, उत्पादकको लाइन काटेको छ ।”