!['कांग्रेस–एमाले मात्र भएको देश कस्तो हुन्छ होला ?'](https://12khari.top/uploads/posts/rajendra-lingden2-1721557290.jpg)
काठमाडौं । राष्ट्रिय प्रजातन्त्र पार्टी (राप्रपा)ले एमालेका नेताहरूले दुई दलीय व्यवस्थाको वकालत गरेकोप्रति आपत्ति जनाएको छ ।
आइतबार प्रतिनिधिसभाको बैठकमा प्रधानमन्त्री केपी शर्मा ओलीले राखेको विश्वासको मतको प्रस्तावमाथिको छलफलका क्रममा राप्रपाका अध्यक्ष राजेन्द्र लिङ्देनले देश बहुदलीय व्यवस्था, समानुपातिक निर्वाचन प्रणाली र समावेशी व्यवस्थाबाट पछि फर्कन नसक्ने बताए ।
“यो सरकार बन्न लागेको समाचार सार्वजनिक हुँदा प्रारम्भमा जे कुरा आएका थिए, एमाले महासचिवले अब हुने सरकारले गर्ने काम र गर्नुपर्ने कुरा टेलिभिजनामा बोल्नुभयो, त्यसपछि हाम्रो आङ सिरिङ्ग भएको छ । तीन ठूला परिवर्तनमा पक्ष विपक्षम थियौँ होला । तर, ००७ सालले प्रजातन्त्र ०४६ ले बहुदलीय व्यवस्था र ०६२ ले समानुपातिक व्यवस्थाबाट मुलुक पछाडि फर्कन सक्दैन । यो गठबन्धनले समानुपातिक समावेशिता सक्ने र दुई दलीय व्यवस्थामा मुलुक लानुपर्छ भनेजस्तो गरेर एमाले महासचिव टीभीमा बोल्नुभयो । कांग्रेस–एमाले भएको देश कस्तो हुन्छ होला ? अरू दल हुँदा त यस्तो छ नभए कस्तो हुन्छ होला ? त्यसकारण यो खतराबाट देश निकाल्न हामी प्रतिपक्षमा बसने निर्णयमा पुगेका छौँ,” उनले भने ।
देशको अस्थिरता साना दलका कारण नभई ठूला दलको व्यवहारको कारणले आइलागेको उनको भनाइ छ ।
“साना दल फुटाउनुहुन्छ के के लोभ देखाउनहुन्छ चलखेल तपाईंहरू के के गर्नुहुन्छ । गणितले मात्र काम गर्ने भए किन किन अघिल्लो पटक वाम सरकार पाँच वर्ष टिकाउन सक्नुभएन?,” उनले प्रश्न गरे ।
उनले राष्ट्रिय सहमतिको सरकार बनाउन चाहेको भए माओवादीसहित फरक मत राख्ने आफ्नो दललाई पनि अटाउने गरी वातावरण बनाउन माग गरे ।
“राष्ट्रिय सहमति कायम गर्न चाहानुहुन्छ भने देशका लागि केही गर्न चाहान्छु भने नवीन समझदारी गर्नुस् । माओवादीलाई पनि अटाउने फरक मत राख्नेलाई नयाँ वातावरण बनाउनुहोस् । अरूलाई पनि मिलाउनुहोस्,” उनले भने, “संविधानमा नमिलेको कुरामा व्यापकरूपमा इमान्दारपूर्वक छलफल गरौँ ।”