ओटावा । क्यानडामा कार चोरी हुने घटनाले त्यहाँका बासिन्दा हैरान भएका पाइएको छ । एक तथ्यांकानुसार, सन् २०२२ मा त्यहाँ कुल एक लाख पाँच हजार गाडी चोरिएको थियो । यसको हिसाब गर्दा हरेक पाँच मिनेटमा एउटा कार चोरी हुने गरेको देखिएको छ ।

कार चोरीका पीडितमा त्यहाँका संघीय न्यायमन्त्री समेत छन् । उनको सरकारी गाडी टोयोटा हाइल्यान्डर एक्सएलई दुईपटकसम्म चोरिएको थियो ।

केही महिनाअघि इन्टरपोलले एउटा सूची सार्वजनिक गरेको थियो । त्यसमा १३७ यस्ता देश थिए, ती कार चोरी मामिलामा सबैभन्दा खराब थिए । सूचीमा क्यानडा टप १० मुलुकमा परेको थियो ।

इन्टरपोलका प्रवक्ताका अनुसार, गएको फेब्रुअरीयता विश्वमा यस्ता १५ सय कार पत्ता लागेका छन्, ती क्यानडाबाट चोरिएका थिए । यस्तै, करिब २०० कारको पहिचान हरेक हप्ता दोस्रो देशको बन्दरगाहमा गरिँदै आएको छ ।

कार चोरीको समस्याका कारण इन्स्योरेन्स ब्युरो अफ क्यानडाले ‘राष्ट्रिय संकट’ नै घोषणा गरेको छ । ब्युरोका अनुसार, बिमा कम्पनीले अघिल्लो वर्ष गाडीको चोरीको दाबीमा एक अर्ब अमेरिकी डलरभन्दा बढी रकम भुक्तानी गर्नुपरेको थियो ।

प्रहरी अधिकारीले गाडीलाई चोरीबाट बचाउने तरिकासहितको सार्वजनिक बुलेटिन नै जारी गर्नुपरेको थियो ।

क्यानडाका कतिपय मानिस स्वयंले नै कारको सुरक्षाका उपाय अपनाइरहेका पाइएको छ । उनीहरूले आफ्नो कारमा ट्रयाकर लगाउनुका साथै निजी सुरक्षाकर्मी राख्नेसम्मका कार्य गरिरहेका छन् । जो सक्षम छन्, उनीहरूले रिट्रैक्टेबल बोलार्डको समेत प्रयोग गरिरहेका छन् ।

कोरोना महामारीपछि अमेरिका, बेलायत र क्यानडामा कार चोरीका घटना बढेको जनाइएको छ ।

चोरी घटना
सन् २०२२ अक्टोबरमा एक बिहान क्यानडाका लोगन लाफरनियर सुतेर जब उठे, उनको रैम रिबेल ट्रक जहाँ पार्क गरिन्थ्यो – त्यहाँ खाली थियो ।

उनको नयाँ गाडी त्यहाँ थिएन । उनको घर ओन्टारियोको मिल्टन सहरमा छ । जब उनले सेक्युरिटी क्यामेरा हेरे, रातको अँध्यारोमा हुडी पहिरिएका दुई मानिस पिकअपमा छिरेर गाडीलाई सजिलै लिएर गएको देखियो ।

केही महिनापछि त्यही गाडी घानामा बिक्रीका निम्ति राखिएको वेबसाइटमा देखियो । घाना लोगनको घरबाट समुद्रपार करिब आठ हजार ५०० किलोमिटर दूरीमा छ । लोगनलाई पूरै भरोसा थियो कि त्यो गाडी उनकै हो । बीबीसी हिन्दीबाट ।