काठमाडौं । प्रमुख प्रतिपक्ष दल नेपाली कांग्रेसका सांसद प्रतिमा गौतमले विपद् व्यवस्थापन गरेर जनताको ज्यान जोगाउन सरकारले गरेको काम सदनलाई जानकारी गराउन अनुरोध गरेकी छन् । सोमबारको प्रतिनिधिसभा बैठकको विशेष समयमा बोल्दै उनले देशैभर बाढीपहिरोले जनधनको क्षति भएको करोडौँको संख्यामा भौतिक पूर्वाधार बाढीले बगाएको तर्फ सरकारको ध्यानाकर्षण गराइन् । 

उनले नेपाल जलवायु परिवर्तनको जोखिमको हिसाबले चौथो नम्बरमा पर्ने देश रहेको भन्दै यसतर्फ पनि सरकार गम्भीर बन्नुपर्ने विषय उठान गरिन् । सांसद गौतमले यो वर्ष मनसुन भित्रेको २५ दिनमै देश यति धेरै आक्रान्त बन्दा समेत सरकार किन उदासिन भएर जनताको सेवामा नलागेको भन्ने प्रश्न गरिन् ।

उनले दसैँ तिहार जस्तै मनसुन पनि हरेक वर्ष सक्रिय हुने भन्दै यसतर्फ सरकारले दीर्घकालीन योजना बनाएर काम नगरेको देख्दा जनताले सरकारबाट आश के गर्ने भन्ने विषय उठाइन् । “राज्य गम्भीर नभएको स्थितिमा नागरिकले दुःख पाएका छन् । राज्य छ, सरकार छ केही गर्छ भन्दा भन्दै विपद्को सामना गर्नुपर्छ,” उनले भनिन्, “राज्य छ कि छैन ? गम्भीर भएर विपद्का लागि राज्य तयारी भएर बस्नुपर्छ । गम्भीर ढंगबाट राज्य अघि बढोस् ।” 

उनले काठमाडौंमा खोला नपसेको भन्दै खोलामा बस्ती बस्दा बढी क्षति भएको समेत उल्लेख गरिन् । साथै, उनले यस्तो विपद्को अवस्थामा डेंगी संक्रमण बढ्ने भन्दै त्यसको नियन्त्रण गर्न सरकारले के गरेको छ सदनलाई जानकारी दिन अनुरोध गरिन् । उनले यो फाइल खोल्छौँ, त्यो खोल्छौँ भनेर धम्काउन छोडेर विपद् व्यवस्थापनमा लाग्न अनुरोध गरिन् ।