काठमाडौं । नेपाली कांग्रेसका सांसद डिगबहादुर लिम्बूले नयाँ सरकार गठनका लागि खुट्टा कमाउने काम पार्टीका शीर्ष नेताहरूले गर्न नहुने बताएका छन् । 

नेपाली कांग्रेसका नेता डा. शेखर कोइरालाले प्रधानमन्त्री पुष्पकमल दाहाल ‘प्रचण्ड’सँग भेट गरेकोप्रति लक्षित गर्दै उनले यस्तो बताएका हुन् । उनले शीर्ष नेताहरूले खुट्टा नकमाई कांग्रेस–एमाले बीचका समझदारीअनुसार नयाँ सरकार गठनका लागि अघि बढ्न आग्रह गरे । 

आइतबार प्रतिनिधिसभा बैठकमा विशेष समय लिएर बोल्दै सांसद लिम्बूले मुलुकमा विद्यमान समस्या समाधानका लागि दुई पार्टीबीच नयाँ सरकार गठन गरेर अघि बढ्ने समझदारी भएको उल्लेख गरे । त्यसलाई कार्यान्वयन गरेर अघि बढ्ने काममा ढिलाइ गर्न नहुने सांसद लिम्बूको भनाइ थियो । 

“अहिलेको परिस्थितिमा नेकपा एमाले र नेपाली कांग्रेसले मुलुकको समस्या समाधान गर्ने जुन जमर्को गरेका छन् । म आग्रह गर्न चाहन्छु– हाम्रो पार्टीका शीर्ष नेताहरूले पनि खुट्टा नकमाइकन, धोकाधडी नगरीकन स्थिर सरकार दिएर अघि बढ्नसक्ने परिस्थिति निर्माण गर्नुपर्छ भन्ने कुरा आग्रह गर्न चाहन्छु,” उनले भने । 

सांसद लिम्बूले कांग्रेस–एमालेले मुलुकमा राजनीतिक स्थिरता दिन सक्ने भएकाले पनि नयाँ सत्तासमीकरण बनाएर अघि बढने सहमति भएको दाबी गरे ।