काठमाडौं । अमेरिकामा बसोबास गर्दै आएका लेखक तथा व्यवसायी सानुबाबु सिलवालद्वारा लिखित ‘सपना र यथार्थमा अमेरिकामा’ नामक पुस्तक शुक्रबार बत्तीसपुतली, काठमाडौंमा आयोजित एक विशेष समारोहमा लोकार्पित गरिएको छ । कार्यक्रम मन्त्रिपरिषद्का पूर्वअध्यक्ष खिलराज रेग्मीको प्रमुख आतिथ्य र लेखकका ८६ वर्षिय पिता लीलानाथ सिलवालको सभापतित्वमा सम्पन्न भएको थियो ।
लोकार्पित पुस्तक २८३ पृष्ठको र ९ एकाइमा विभक्त रहेको छ । पुस्तकमा आर्थिक धरातलमा रहेर अमेरिकालाई चिनाउँदै अमेरिकामा रहेका नेपालीहरूको अनुभव, अमेरिकामा नयाँ जीवन सुरु गर्ने मार्गनिर्देशन, त्यहाँ उपलब्ध अवसरहरू, मुद्रा व्यवस्थापन, करलगायतका विषयहरू समेटिएका छन् । पुस्तकमा अमेरिकी कानुनसम्बद्ध केही मुद्दाहरू, सडक सुरक्षा र नियमका प्रसङ्गहरु, र संयुक्त राज्य अमेरिका र नेपालबीचको सम्बधजस्ता विविध विषयका बारेमा पनि जानकारी गराइएको छ । गीता सिलवालद्वारा प्रकाशित उक्त पुस्तक अमेरिकामा जीवनयापन गर्न चाहने र जीवन यापन गरिरहेका नेपालीहरूलाई उपयोगी हुने देखिन्छ ।
विमोचनका क्रममा प्रमुख अतिथि रेग्मीले विदेशमा रहँदा पनि सिलवालले नेपाल र नेपालीप्रति गरेको समर्पणको प्रशंसा गरे । उनले भने, ‘अमेरिकामा बसेर पनि सानुबाबु सिलवालले नेपाली जनताको हितका लागि गरेको प्रतिबद्धता साँच्चै प्रशंसनीय छ । नेपालमा पुस्तक विमोचन गर्ने उनको निर्णयले संसारको जुनसुकै ठाउँमा भए पनि नेपालीहरूको आफ्नो मातृभूमिप्रतिको मायालाई झल्काउँछ ।’
रेग्मीले ‘जननी जन्मभूमि स्वर्गदपि गरियसी, आमा र मातृभूमि स्वर्गभन्दा ठूलो हुन्छ’ भन्ने यथार्थ उद्धृत गर्दै आफ्नो सांस्कृतिक पहिचान जोगाएर राष्ट्रको विकासमा योगदान पुर्याउनु पर्नेमा जोड दिए । उनले रोजगारी सृजना र कृषि विकासका लागि सामूहिक प्रयास गर्न आह्वान गर्दै देशको समृद्धिका लागि एकता र वैज्ञानिक र आधुनिक प्रक्रिया अपनाउन आग्रह गरे ।
लेखक सानुबाबु सिलवालले अवसरको खोजी गर्दै अमेरिका पुगेका तर चुनौती सामना गरिरहेका नेपालीलाई मार्गदर्शन र सहयोग गर्ने आफ्नो उद्देश्य रहेको उल्लेख गरे, ‘मलाई दुःखमा परेका नेपालीहरूबाट रातबिरात फोन आउँछ, यसलाइ म कत्ति पनि दुख मान्दिनँ । उनीहरुको समस्या समाधान खोज्न म निरन्तर लागिरहेको छु । मेरो उद्देश्य उनीहरूको आर्थिक समृद्धिको लागि मार्ग प्रशस्त गर्नु हो ।’
लेखक सिलवालले आफूले निरन्तर मिहिनेत र संघर्ष गरेर व्यवसायिक सफलता तिर उन्मेख भएको र यो क्रममा आफ्ना प्रेरणाका स्रोतहरुको उल्लेख गरे । ‘आफ्ना ज्ञान र अनुभव सबैमा बाँडन पाउँदा म निकै खुसी छु।’ लेखक सिलवाले भने ।
कार्यक्रममा अतिथिहरु डा. जयराज आचार्य, र डा. सुरेन्द्र केसी, सांसद जगन्नाथ खतिवडा, वरिष्ठ पत्रकारहरु होमनाथ दाहाल र तारा बरालले पनि लेखकको लगनशीलता र उदारताको मुक्तकण्ठले प्रशंशा गर्दै आआफ्नो अभिव्यक्ति राखेका थिए ।
समारोहमा वरिष्ठ साहित्यिक व्यक्तित्वहरू, पत्रकारहरू र विभिन्न क्षेत्रका विज्ञहरू लगायतको बाक्लो उपस्थिति थियो ।