काठमाडौं । नेकपा (एकीकृत समाजवादी)का सम्मानित नेता एवं पूर्वप्रधानमन्त्री झलनाथ खनालले नेकपा (एमाले)का अध्यक्ष केपी शर्मा ओलीलाई भष्मासुरको संज्ञा दिएका छन् । ओलीले संसद् विघटन गरेकाले मुलुकमा राजनीतिक अस्थिरता बढेको र नेपालको राजनीतिलाई दक्षिणपन्थी दिशातर्फ लगिएको आरोप पनि उनले लगाए ।

पार्टीनिकट प्रवासी नेपाली मञ्चले शनिबार काठमाडौंमा गरेको कार्यक्रममा उनले ओलीले संसद् विघटन गर्दा नेपालको कम्युनिस्ट आन्दोलन पनि विभाजनको मारमा परेको बताए । उनले ओलीको गलत कदमको विरोधमा आफूहरूले एमालेबाट विद्रोह गर्नुपरेको जिकिर गरे ।

सम्मानित नेता खनालले दक्षिणपन्थी अवसरवादीविरुद्धको संघर्षलाई आफूहरूले अघि बढाएको बताए ।

प्रवासी नेपाली मञ्चको कार्यक्रममा झलनाथ खनालको भनाइ पढ्नोस्–
हामीले कम्युनिस्ट आन्दोलनलाई एकताबद्ध गराउँदै नेकपामा पुर्‍याइसकेका थियौँ । जुन नेकपामा पुर्‍याउँदैखेरि १० लाख पार्टी सदस्यहरू हामी थियौँ । संघीय संसद्मा हामी करिब दुईतिहाइ बहुमतमा थियौँ । र, यो देशका अहिलेका सातवटा प्रदेशमध्ये हामी ६ वटामा पूर्ण बहुमतमा थियौँ । र, तल अहिले रहेका ७५३ वटा पालिकाहरूमध्ये हामी ४०० भन्दा बढीमा बहुमत प्राप्त गरिसकेका थियौँ । देश वाममय बन्दै गइरहेको थियो । तर, जब त्यस्तो शक्तिको नेतृत्व गर्ने ठाउँमा जुन नेतालाई हामीले पुर्‍यायौँ, उनी निस्किए – भष्मासुर । यो भष्मासुरको कारणले गर्दाखेरि उनले यो कम्युनिस्ट आन्दोलनलाई क्रमिक रूपले दक्षिणपन्थतर्फ, अधोगतितिर बढाउँदै लैजाने काम भयो । र, आफ्नै बहुमत मात्रै होइन, दुईतिहाइ बहुमत भएको संसद्लाई विघटन गर्ने काम भयो । जसले गर्दाखेरि नेपालको राजनीतिलाई दक्षिणपन्थीभासतर्फ लग्ने, अस्थिरतातर्फ लैजाने, कम्युनिस्ट आन्दोलनलाई दिशाहीन बनाउने यो कामहरू भयो । जसको परिणाम कम्युनिस्ट आन्दोलन फेरि विभाजन र विखण्डनतर्फ लागेको छ । यो विखण्डन र विभाजनकै परिणामस्वरूप हामीले पनि त्यो गलत कुराविरुद्ध विद्रोह गर्नुपर्‍यो । न्युज एजेन्सी नेपाल