काठमाडौं । पछिल्लो २४ घण्टामा देशका केही स्थानमा ‘अति भारी’ वर्षा मापन गरिएको छ । यो अवधि (शुक्रबार बेलुका ७ देखि शनिबार बेलुका ७ बजेसम्म)मा पाल्पामा सबैभन्दा धेरै पानी परेको जल तथा मौसम विज्ञान विभागले जनाएको छ ।

यो अवधिमा पाल्पामा ३९१ मिलिमिटर वर्षा मापन गरिएको छ । यो अति भारी वर्षा भएको विभागको मौसम पूर्वानुमान महाशाखाका मौसमविद् चिरञ्जीवी भेटवालले बाह्रखरीलाई जानकारी दिए । कुनै स्थानमा २४ घण्टामा २०० मिलिमिटरभन्दा बढी पानी पर्नुलाई अति भारी वर्षा भनिने उनले बताए ।

पछिल्लो २४ घण्टामा पाल्पा र दाङका केही स्थान, स्याङ्जा, पर्वत, कास्की, नवलपुर, अर्घाखाँची र प्युठानमा अति भारी वर्षा मापन गरिएको विभागले जनाएको छ ।

यो अवधिमा काठमाडौं, ललितपुरलगायत कतिपय स्थानमा ‘धेरै भारी’ वर्षा भएको छ । कुनै स्थानमा २४ घण्टामा १०० देखि २०० मिलिमिटर पानी पर्नुलाई धेरै भारी वर्षा भनिने मौसमविद् भेटवालले जानकारी दिए ।

यो अवधिमा काठमाडौंको धापमा १५३.६, कीर्तिपुरमा १५०.६, काठमाडौंकै नैकापमा १४५.२, ललितपुरको लेलेमा १६८.८, गोदावरीमा १४८.८ मिलिमिटर वर्षा मापन गरिएको छ ।

शुक्रबार रातिदेखि शनिबार दिनभर देशका अधिकांश स्थानमा वर्षा भएको छ । मौसमविद्का अनुसार, कुनै स्थानमा २४ घण्टामा ५० देखि १०० मिलिमिटर पानी पर्नुलाई ‘भारी’ वर्षा भनिन्छ ।

यस्तै, २४ घण्टामा १० देखि ५० मिलिमिटरलाई ‘हल्कादेखि मध्यम’ र १ देखि १० मिलिमिटरसम्म पानी पर्नुलाई ‘हल्का’ वर्षा भनिने महाशाखाले जानकारी गराएको छ ।