काठमाडौं । गोलकिपर इमिलियानो मार्टिनेज नायक बन्दा साविक विजेता अर्जेन्टिनाले इक्वेटरविरुद्ध पेनाल्टी सुटआउटमा जित निकाल्दै कोपा अमेरिका २०२४ को सेमिफाइनल यात्रा तय गरेको छ ।

अमेरिकाको एनआरजी रंगशालामा भएको खेलको निर्धारित समय १/१ गोलको बराबरीमा सकिएपछि नतिजाको निर्णय पेनाल्टी सुटआउटबाट भएको हो । पेनाल्टी सुटआउटमा अर्जेन्टिनाले इक्वेडरविरुद्ध ४/२ को जित निकालेको हो । प्रतियोगिताको क्वाटरफाइनलमा र सेमिफाइनलमा अतिरिक्त समय नभएकाले खेल सोझै पेनाल्टीमा प्रवेश गरेको हो ।

पेनाल्टीमा अर्जेन्टिनाबाट प्रहारका लागि आएका पाँचमध्ये चारजनाले गोल गरे । अर्जेन्टिनाबाट पहिलो प्रहारका लागि आएका कप्तान लियोनल मेसीले ‘पेन्नेन्का’को प्रयास गरे पनि बारमा लागेर फर्किएको थियो । 

तर, यसपछि प्रहारका लागि आएका हुलियन आल्भारेज, एलेक्सिस म्याक एलिस्टर, गोन्जालो मोन्सियल र निकोलस ओटामेण्डीले पेनाल्टी प्रहारमा कुनै गल्ती गरेनन् । 

इक्वेडरका एन्जल मिना र एलन मिन्डाको प्रहार अर्जेन्टिनाका गोलकिपर मार्टिनेजले जोगाएका थिए । इक्वेडरको सुरुआती दुई प्रहार बचाएपछि अर्जेन्टिना सहज स्थितिमा पुगेको थियो । इक्वेडरको तेस्रो र चौथो प्रहार गोल भए पनि त्यो जितका लागि पर्याप्त बनेन । 

इक्वेडरबाट तेस्रो प्रहारका लागि जोन एबोह र चौथो प्रहारका लागि आएका जोर्डी कैसेडोले गोल गरेका थिए ।

त्यसअघि खेलमा अर्जेन्टिनाले अग्रता बनाए पनि त्यसलाई जोगाउन भने सकेन । ३५ औँ मिनेटमा अर्जेन्टिनाका  मार्टिनेजले गोल गर्दै टिमलाई अग्रतामा राखेका थिए‌ । 

तर, इन्जुरी समयको पहिलो मिनेटमा इक्वेडर खेलमा फर्किएको थियो । इक्वेडरका केबिन रोड्रिगेजले इन्जुरी समयको पहिलो मिनेटमा गोल गर्दै टिमलाई बराबरीमा फर्काएका थिए ।