काठमाडौं । युवा तथा खेलकुदमन्त्री विराजभक्त श्रेष्ठले राष्ट्रिय खेलकुद नीति पुनरवलोकनको काम भइरहेको बताएका छन् । बिहीबार राष्ट्रियसभा बैठकमा सांसदहरूका प्रश्नको जवाफ दिने क्रममा उनले यस्तो बताएका हुन् ।

राष्ट्रिय युवा नीति परिमार्जनका निम्ति सबै प्रदेशका सरोकारवालासँग सुझाव लिइएको उनले जानकारी गराए । उनले अन्तर्राष्ट्रियस्तरमा पदक विजेता खेलाडीले पुरस्कारको राशि बैंकिङ खातामार्फत पाउने व्यवस्था पनि आफूले मिलाएको बताए ।

“राष्ट्रिय युवा नीति, २०७२ र राष्ट्रिय खेलकुद नीति, २०५७ लाई पुनरवलोकन गर्ने कार्य भइरहेको छ । यी नीतिहरू परिमार्जनका लागि सबै प्रदेशमा गई सरोकारवालाहरूको राय, सुझाव संकलन गरिएकाले युवा र खेलकुदको विषयमा देखिएका समस्या समाधान हुन्छ भन्ने मेरो विश्वास छ,” उनले भने ।

मन्त्री श्रेष्ठले बजेटको सीमितताका कारण खेलकुद क्षेत्रको विकासमा टेवा पुग्ने गरी काम गर्न नसकिएको स्पष्ट पारे । न्युज एजेन्सी नेपाल