काठमाडौं । साविक विजेता मार्कोटा भान्ड्रोसोभाको विम्बल्डन यात्रा पहिलो चरणमै समाप्त भएको छ । वर्षको तेस्रो ग्रान्डस्लाम प्रतियोगिता विम्बल्डनको पहिलो चरणमा स्पेनकी जेसिका बोजास मानेरियोसँग पराजित भएपछि महिला एकलतर्फकी साविक विजेता भान्ड्रोसोभाको यात्रा पहिलो चरणबाटै समाप्त भएको हो ।

गत वर्ष प्रतियोगिताको दाबेदारीमा नरहे पनि फाइनलमा ओन्सा जाबेउरलाई हराउँदै भान्ड्रोसोभाले महिला एकलको उपाधि जितेकी थिइन् । तर, मंगलबार भएको यस वर्षको पहिलो चरणमा मानेरियोले साविक विजेताविरुद्ध सोझो सेटमा जित दर्ता गराइन् ।

विश्व वरीयताको ८३औँ स्थानकी मानेरियोले पहिलो सेटमा ६–४ को अग्रता बनाएकी थिइन् । दोस्रो सेटमा पनि २१ वर्षीय मानेरियाले ६–२ को जित दर्ता गरेपछि साविक विजेताको यात्रामा पूर्णविराम लागेको हो । ग्रान्डस्लाममा मानेरियोको यो पहिलो जित हो । विम्बल्डनको इतिहासमा सन् १९९४ पछि पहिलोपटक महिला एकलको साविक विजेता पहिलो चरणबाटै बाहिरिएकी हुन् ।

“म निकै खुसी छु । यो मेरो जीवन र करियरको सबैभन्दा महत्त्वपूर्ण क्षण हो,” जितपछि मानेरियाले भनिन्, “मेरो जीवनमा खेलेको यो सबैभन्दा सुन्दर प्रतियोगिता हो, त्यसैकारण आजको खेल हेर्न आइपुगेका सम्पूर्णमा धन्यवाद ।”