काठमाडौं । नेपाल समाजवादी पार्टीका अध्यक्ष एवं पूर्वप्रधानमन्त्री डा. बाबुराम भट्टराईले नेपालले भूराजनीतिक सन्तुलन मिलाउन आवश्यक रहेको बताएका छन् । शनिबार काठमाडौंमा आयोजित एक कार्यक्रममा उनले यस्तो बताएका हुन् ।

उनले नेपालले भूराजनीतिक सन्तुलन मिलाउन सके देश बन्ने टिप्पणी गरे । नेपाल ऐतिहासिक कारणले पछि परेको भए पनि जैविक, वातावरणीय रूपले पछाडि नरहेको उनले उल्लेख गरे ।

नेपाल समृद्ध बन्न पछिल्लो ज्ञान–विज्ञानमा आधारित वैज्ञानिक प्रणालीलाई अपनाउनुपर्नेमा उनले जोड दिए । आन्तरिक लोकतन्त्रलाई पनि मजबुत बनाउन जरुरी रहेको उनले बताए । समावेशी र सहभागितामूलक लोकतन्त्रलाई अझ माथि पुर्‍याउने गरी काम गर्नुपर्ने उनको भनाइ थियो ।

अध्यक्ष भट्टराईले सक्रिय शान्तिवादको नीति बनाएर भारत र चीनसँगका समस्या समाधान गर्नुपर्ने आवश्यकता औँल्याए । नेपालले रक्षात्मक तयारी गर्ने तर युद्ध नगर्ने रणनीति अपनाउनुपर्ने उनले बताए ।

उक्त कार्यक्रममा बाबुराम भट्टराईको भनाइ पढ्नोस्–
नेपाल पछाडि परेको ऐतिहासिक कारणले हो । हामी हाम्रो जैविक, वातावरणीय रूपले हामी पछाडि परेका छैनौँ । नेपाल समृद्ध बन्न सक्छ । सर्त के हो भने हामीले पछिल्लो ज्ञान–विज्ञानमा आधारित वैज्ञानिक विचार, प्रणालीलाई अपनाउनुपर्छ । नेपालको जुन एउटा बहुजातीय, बहुभाषी सांस्कृतिक चरित्र हो, यो नेपालको मौलिकता हो भन्ने कुरालाई पनि स्वीकार्नुपर्छ । हाम्रो थुप्रै वामपन्थी भनेको छ, यो छोडिदिऔँ, यो घाँडो भयो, संघीयता छोडिदिऔँ, यो पहिचानवादी कुरा नगरौँ भन्नुहुन्छ खुसुक्क मसँग आएर । यथार्थ हेर्ने हो नि, यथार्थ हेर्दा नेपाल त विविधतायुक्त देश हो । आन्तरिक लोकतन्त्रलाई पनि बढी मजबुत हामीले बनाऔँ । समावेशी र प्रत्यक्ष लोकतन्त्र छ, त्यसलाई अझ उन्नत बनाऔँ । समावेशी र सहभागितामूलक लोकतन्त्रलाई अझ माथि पुर्‍यायौँ । त्यसो हुन सक्यो र भूराजनीतिक सन्तुलन मिलाउन सकियो भने नेपाल बन्छ । न्युज एजेन्सी नेपाल