काठमाडौं । प्रमुख प्रतिपक्ष दल नेपाली कांग्रेस सांसद एनपी साउदले अनाहकमा ११ जना राजदूत फिर्ता बोलाइएको भन्दै आपत्ति जनाएका छन् । बिहीबार प्रतिनिधिसभा बैठकको विशेष समयमा बोल्दै उनले राजदूत फिर्ताको कारण राजनीति नियुक्ति भएको भनि प्रधानमन्त्री पुष्पकमल दाहाल प्रचण्डले दिएको जवाफप्रति पनि आपत्ति जनाए । पूर्वपरराष्ट्रमन्त्री समेत रहेका उनले यस्ता घटनाले कुटनीतिक र अन्तर्राष्ट्रिय मञ्चमा नेपालको इज्जत घटेको उल्लेख गरेको बताए ।  

“नेपालले आफ्नो कुटनीति र भरिपूर्ण बनाउने यही बेला ११ राष्ट्रबाट ११ जना राजदुत फिर्ता बोलाएका छौँ । प्रशासन र कर्मचारीहरूबाट जाने र विभिन्न पेसाबाट जाने राजदूतलाई के कारणले फिर्ता बोलाइयो जानकारी नदिई फिर्ता बोलाइयो । यसले कुटनीतिक र अन्तर्राष्ट्रिय क्षेत्रमा विश्वसनीयता घटेको छ,” उनले भने । 

रास्वपालक्षित प्रतिकृया दिँदै राजनीतिक दलले एनजीओमा छनोट गरेजस्तो राजदूत छनोटको विषय बनाएको उनले बताए । “एनजीओमा छनोट गरेको विषय बनाएर सूचना र विज्ञापन निकालेर दलले विज्ञापन निकालेर राजदूत खोज्दछ । यसले विश्वमा प्रतिष्ठामा आँच पुगेको छ,” उनले भने । 

उनले चीनका उपविदेशमन्त्रीको नेपाल भ्रमण र बीआरआई सम्झौताको विषयमा पनि कुरा उठाए । बीआरआईमा गर्ने सम्झौताको विषय प्रतिपक्षसँग छलफल नभएकोमा पनि उनले आपत्ति जनाए । 

“प्रमज्यूले भन्नुभएको छ, एडीबी, वल्र्ड बैंककै ब्याजदरमा लोन लिन्छौँ भन्नुभएको छ । त्यो बाटोमा अघि बढेको छ कि छैन । त्यसकारण हाउसलाई विश्वासमा लिनुपर्ने आवश्यक्ता हामीले देखेका छौँ,” उनले भने, “राष्ट्रिय सहमति भएर अघि बढ्नुपर्छ ।”