काठमाडौं । प्रतिनिधिसभाको शिक्षा, स्वास्थ्य तथा सूचना प्रविधि समितिका गणपूरक सदस्य निर्धारित समयमा उपस्थित नहुँदा आजको बैठक एक घण्टापछि सुरु भयो । बैठकका निम्ति शिक्षा, विज्ञान तथा प्रविधिमन्त्री सुमना श्रेष्ठ भने ठिक समय (बिहान ७ः३०) बजे समितिको सभाकक्ष, सिंहदरबारमा उपस्थित भएकी थिइन् ।

निर्धारित समयमा २४ सदस्यीय समितिका सभापति अम्बरबहादुर थापासहित  ६ सांसद मात्र उपस्थित भएपछि बैठक सुरु हुन सकेन । यस दिन समितिमा ‘नेपाल विश्वविद्यालयका सम्बन्धमा व्यवस्था गर्न बनेको विधेयक’माथि छलफल गर्ने कार्यसूची थियो ।

बिहान १०ः३० बजेपछि शिक्षामन्त्री श्रेष्ठले आफ्नो अन्यत्र बैठक रहेकाले जान अनुमति माग्दा सभापति थापाले मन्त्री र सांसदहरूको समय मिलाउन आफूलाई हम्मेहम्मे पर्ने गरेको दुःखेसो गरे ।

“म यो विधेयक छिटो पारित गरेर विद्यालय शिक्षासम्बन्धी विधेयकमा छलफलमा जाऊँ भन्ने सोचेको हो, तर सोचेजस्तो भइरहेको छैन,’’ सभापति थापाले भने, “समयप्रति सबैले उत्तिकै चासो र गम्भीरता देखाउन आवश्यक छ ।’’

समितिको आजको बैठकमा उक्त प्रस्तावित विश्वविद्यालयका निम्ति कुलपति प्रधानमन्त्री राख्ने÷नराख्ने, उपकुलपतिका अधिकार कसरी व्यवस्थित गर्ने भन्नेलगायत विवाद भएको थियो । त्यसबारे आपसी छलफल गरेर सहमतिको खाका पेस गर्न सदस्य विद्या भट्टराईलाई जिम्मेवारी दिइएको छ । राष्ट्रियसभाबाट पारित उक्त विधेयकको दफा २८ सम्म छलफल गरिएको छ । रासस