काठमाडौं । प्रधानमन्त्री पुष्पकमल दाहाल प्रचण्डले मन्त्रीले टेरेनन् भन्ने आफूलाई नपरेको बताएका छन् । मंगलबार प्रतिनिधिसभा बैठकमा बजेटमाथि मन्त्रालयगत छलफलका क्रममा उठेको प्रश्नको जवाफ दिँदै उनले परम्परागत शैलीलाई बदल्न नसकिएको बताए । 

माओवादीका सांसद अमनलाल मोदीले मन्त्रीले टेरेनन् भन्ने समाचार आएको भन्दै नटेर्ने मन्त्री बर्खास्त हुन्छन कि हुँदैनन् भनि सोधेको थिए ।

जवाफमा प्रधानमन्त्रीले भने, “मन्त्री र प्रधानमन्त्रीको सम्बन्ध माननीय सदस्यहरूले जसरी राख्नुभएको छ । असमझदारीको कारणले चाहिँ होइन । हाम्रो काम गर्ने परम्परागत शैली र विधिविधानलाई बदल्न नसकिएको हो ।”

उनले मन्त्रीहरूको बाध्यता आफू नजिकबाट नियालेको बताए । बजेट विनियोजनमा तीन करोडभन्दा साना आयोजना संघले नहर्ने भनिए पनि मन्त्रीहरूले सो विषयमा ध्यान नपुर्‍याएको गुनासो केही अघि प्रधानमन्त्रीले गरेका थिए । 

“प्रधानमन्त्रीको रूपमा मैले भनेको मन्त्रीले टेरेनन् भन्ने परेको छैन । मन्त्रीको आफ्नै बाध्यता नजिकबाट हेरेको छु । तीन करोडभन्दा साना आयोजना अब संघले नगर्ने भन्ने कुरा पटक–पटक भनेको छु । तर, परे । यसलाई के गरी करेक्सन गर्नेभन्दा तीन करोडभन्दा तलका प्रदेश र स्थानीय तहले कार्यान्वयनको जिम्मा दिने गरी व्यवस्था गर्ने भनेको छु ।” 

उनले त्यसैगरी कार्यान्वयन हुने विश्वास पनि व्यक्त गरे ।