नयाँ दिल्ली । भारतमा १८औँ लोकसभाको पहिलो सत्र आज (सोमबार)देखि सुरु हुँदै छ । सत्रको सुरुमा नयाँ सांसदलाई शपथ दिलाइनेछ । सबैभन्दा महत्त्वपूर्ण लोकसभा अध्यक्षको निर्वाचन प्रक्रिया पनि सुरु हुनेछ ।

भाजपाका सांसद ओम बिरला १७औँ लोकसभाका अध्यक्ष थिए । पहिलाको अध्यक्षको कार्यकाल नयाँ लोकसभाको पहिलो सत्रसम्म मात्र हुने गरेको छ ।

१८औँ लोकसभाको कारबाही सुरु हुनासाथ ज्येष्ठ सदस्यले अल्पकालीन सभामुखको भूमिकामा काम गर्छन् । यसपालि नयाँ सांसदलाई भाजपाका भतृहरि महताबले शपथ दिलाउनेछन् ।

भारतको संविधानको धारा ९३ अनुसार लोकसभा अध्यक्षको निर्वाचन गरिन्छ । लोकसभामा उपस्थित आधाभन्दा बढी सांसदले जसलाई मत दिन्छन्, तिनै व्यक्ति उक्त पदमा नियुक्त हुने व्यवस्था छ ।

स्वतन्त्र भारतको इतिहासमा लोकसभा अध्यक्ष सर्वसम्मत रूपमा चयन हुँदै आएका छन् । भारतमा विपक्षीलाई उपसभामुख पद दिने गरिए पनि यसपालि के हुन्छ भन्न सकिने अवस्था नरहेको जनाइएको छ । बीबीसी हिन्दीबाट ।