काठमाडौं । कवाड व्यवसायी संघर्ष समितिले रिङरोडभित्रका कवाड हटाउने निर्णयको विरोध गर्दै बुधबार पनि काठमाडौंमा प्रदर्शन गरेका छन् । बुधबार उनीहरू काठमाडौंको माइतिघरदेखि नयाँ बानेश्वरसम्म विरोध प्रदर्शन गरेका हुन् । 

‘छोटे राजाहरूको आतंक बन्द गरौँ’, ‘कवाड व्यवसायीहरूको रक्षा गरौँ’ भन्ने व्यानरका साथ प्रदर्शनमा उत्रिएका व्यवसायीहरूले आफूहरूको रोजिरोटी बन्द नगर्न माग गरेका छन् । 

उच्च अदालतले कवाड व्यवसायीलाई नहटाउनू भन्ने आदेश दिँदा पनि महानगरले कवाड व्यवसायीको टहरामा डोजर चलाएको र आफूहरूलाई महानगरबाट हटाउन खोजिएको उनीहरूको गुनासो छ । 

यसअघि मंगलबार कवाड हटाउने निर्णयको विरोध गर्दै काठमाडौं महानगरपालिका घेराउ गर्न खोज्दा कवाड व्यवसायी र प्रहरीबीच झडप भएको थियो ।