site stats
बाह्रखरी :: Baahrakhari
राजनीति
Global Ime bankGlobal Ime bank
९८ वर्षीय वरिष्ठ अधिवक्ता कृष्णप्रसाद भण्डारीका नजरमा न्याय : वकिल पढ्दैनन्, न्यायाधीश सुन्दैनन्, बुझ्दैनन्

काठमाडौं । ६७ वर्षदेखि वकालत गरिरहेका वरिष्ठतम अधिवक्ता कृष्णप्रसाद भण्डारी ९८ वर्ष प्रवेश गरिसकेका छन् । वकालतमा क्रियाशील भण्डारी दैनिकजसो अदालत पुग्छन् । यो उमेरमा पनि उनी जोशिला छन्, कडा बोल्छन्, स्मरणशक्ति पनि उस्तै छ । वरिष्ठ अधिवक्ताहरुका पनि गुरुदेव हुन्, भण्डारी ।

२०१२ सालमा नेपाल ल क्याम्पस भर्ना भएका भण्डारीले २०१४ सालमा अधिवक्ता लाइसेन्स लिएका थिए । 

त्यसयता लगातार उनी वकालत पेशामा छन् । तर, उनलाई समयक्रमसँगै विकसित हुनुपर्ने न्यायालय क्षयीकरणतर्फ अघि बढिरहेको देख्दा चिन्ता लाग्छ । बाह्रखरीसँगको विशेष कुराकानीमा उनले विगतमा अध्ययन गर्ने र न्यायको रोहमा बहस गर्ने वकिल र सुनेर निर्णय गर्ने न्यायाधीश दुवै पाटोमा क्षयीकरण आएको बताए । 

वरिष्ठ अधिवक्ता भण्डारी न्यायालयमा राजनीतिले गाँजेको भन्दै सर्वोच्च अदालत ‘सुपर पार्लियामेन्ट’ बनेको बताउँछन् ।

krishnapdbhandari-(6)-1718768406.jpg
 

“हाम्रो समयमा न्यायाधीशले हाम्रो कुरा सुन्थे, वकिल एकदमै धेरै पढेर बहस गर्थे र न्यायाधीश विद्धान हुन्थे,” भण्डारीले भने, “आज त वकिलहरु व्यापारी भए । एउटा मुद्दा लिनुपर्ने १० वटा मुद्दा बोकेर हिँड्छन् । पढ्दै पढ्दैनन्, नजिर पल्टाउँदै पल्टाउँदैनन् । न्यायाधीशहरु पटक्कै सुन्दैनन् ।”

उनको बुझाइमा, न्यायका निम्ति सबैभन्दा महत्वपूर्ण व्यक्ति वकिल हुन् । तर, वकिलले नै आफ्नो जिम्मेवारी छोडेर पैसाको मात्र पछि लाग्दा न्यायालय सुध्रने अवस्था बनेको छैन ।

“जस्तो जग्गाको मुद्दाका लागि ६ महिनाको म्याद हो । मैले म्याद गुज्रिएको फिराद लेखेर दिएँ भने न्यायाधीशले बदर गर्न सक्छ ? फिराद त वकिलले लेख्ने हो नि !,” भण्डारीले भने, “तर, वकिल पढ्दै पढ्दैनन् । सबैलाई भनेको होइन । विद्वानहरु धेरै छन् । तर, ठूलो संख्या भने व्यापारी नै भयो ।”

वकिलले नपढ्ने र न्यायाधीशले नसुन्ने नबुझ्ने गर्दा न्यायालय ध्वस्त हुन लागेको उनको चिन्ता छ । वरिष्ठतम अधिवक्ता भण्डारीलाई ०६३ सालपछिको एउटामात्र फैसला पढ्न लायक लागेको छ ।

“एउटा फैसला छ प्रतिनिधिसभाको त्यो न्यायाधीश ईश्वरप्रसाद खतिवडाले लेखेका हुन्, धेरै राम्रो छ,” भण्डारीले प्रश्न गरे, “त्योबाहेक एउटा फैसला देखाइदिन सक्नुहुन्छ ? जुन पढ्न लायक होस् ।”

उनी पछिल्ला दिनहरुमा त अदालतले न्याय निरुपणको साटो राजनीति गरिरहेको अनुभूतिमा छन् ।

krishnapdbhandari-(11)-1718768406.jpg
 

“अदालत राजनीति गरिरहेको छ । विचरा अन्यायमा परेका नागरिकका मुद्दा १० वर्षसम्म हेरिँदैनन् । राजनीतिले प्रश्रय पाइरहेको छ,” भण्डारी भन्छन्, “तारिख आउँछ । एकजना तराइतिरको व्यक्तिले भन्यो वकिलसा’ब मर्गेली ! ठूलो वकिल छानेर जग्गा बेचेर ८४ हजार दिए । मुद्दा अघि बढ्दै बढ्दैन । पाँचवर्ष भइसक्यो ‘बेइमान न्यायाधीश’ले डुबाइदियो भन्दै थियो । उसको वकिल त म होइन । तर, यसले प्रश्न उठ्छ अदालतले दुनियाँको मुद्दा हेर्ने कि राजनीतिको ?”

सर्वोच्चमा संवैधानिक आयोगका ५२ पदाधिकारी नियुक्तिविरुद्धको रिट साढे तीन वर्षदेखि फैसला हुन सकेको छैन । यस्तो हुनुमा दुनियाँका चासोको विषय छोडेर सर्वोच्च राजनीतिक विषयमा केन्द्रित हुनुलाई उनले कारण मानेका छन् । 

“दुनियाँको मुद्दामा पटक्कै चासो छैन, यो त अन्याय हो,” भण्डारी भन्छन्, “सुप्रिम कोर्ट (सर्वोच्च अदालत) त सुपर पार्लियामेन्ट भा’छ । यसको प्राथमिकता नै राजनीति भएको छ । पीडितका मुद्दामा न्याय निरुपण भइरहेको छैन ।”

नियुक्तिमै हुने राजनीतिक भागवण्डाले न्यायालयलाई यस्तो अवस्थामा पुर्‍याएको उनको निष्कर्ष छ । अनि भन्छन्, ‘‘न्यायाधीश नियुक्ति हुँदा, परिवारको, आफन्त, निकट र क्षेत्रीयतालाई योग्यता मान्न थालिएपछि हुने यही हो ।’’

उनले न्यायाधीशको फैसलामा कानुनको प्रयोग भए पनि न्यायिक विवेक नभेटिने गरेको बताए । सुनिल पौडेलको मुद्दाको फैसलालाई उदाहरण बनाएका भण्डारीले घुस खानेहरुलाई उन्मुक्ति दिने काम भएको बताए । 

“पौडेलले ९ करोड घुस खाएको ठहर भएको छ । तर, प्रश्न उठ्छ त्यो ९ करोड उसले मात्रै खाएको छ ?,” प्रश्न गर्दै उनले भने, “घुुस खानु अपराध हो । तर, घुस खाने सबैलाई कारबाही भयो त ?”

krishnapdbhandari-(17)-1718768406.jpg
 

उनले सरकारले घुस नखाएको भए पौडेलले भ्रष्टाचारी हुने अवसर नै नपाउने बताए । खानेहरु बाहिर रहेको र खुवाउने जेल परेको उनको बुझाई छ ।

“एउटा माफियाले चारवटी श्रीमतीका नाममा जग्गा किनिदियो, त्यसमा महिलाहरु त निर्दोष छन्,” भण्डारी भन्छन्, “उनीहरुलाई कानुनी कारबाही हुन्छ । माफिया घुमेर हिँड्छ । त्यसैगरी पैसा लैजाने माफिया, मन्त्री, प्रधानमन्त्री खुलेयाम हिँड्छन् – उनीहरुलाई पैसा बुझाउने सचिवहरु जेल जान्छन् । यो अवस्था कहिलेसम्म रहने ?” 

तस्बिर–सुनिल प्रधान
 

प्रकाशित मिति: बुधबार, असार ५, २०८१  १२:४०
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
सरकारले तत्काल सम्बोधन गरोस् !
सरकारले तत्काल सम्बोधन गरोस् !
Hamro patroHamro patro