काठमाडौं । तीन दिनअघि जेठ ३२ मा सामाजिक सञ्जाल फेसबुकमार्फत् एउटा कुकुरको छाउरोको हत्या गरी खाल्डोमा पुरेको भिडियो भाइरल भयो । तीनजना युवाहरुले लाठी प्रहार गरी निर्ममतापूर्वक हत्या गरी खाल्डोमा पुरेको उक्त भिडियो ‘भुतप्रेत’ नामक फेसबुक मार्फत भाइरल भएको थियो ।

उक्त भिडियो भाइरल भएपछि कुकुरको छाउरोलाई हत्या गर्नेमाथि कारबाही गर्न प्रहरीमाथि दबाब बढ्यो । कुकुरको संरक्षणका लागि लामो समयदेखि अभियान नै चलाएका स्नेहा केयर संस्थाका प्रतिनिधिले कुकुरको छाउरोको हत्या गर्ने माथि कारबाहीका लागि प्रहरीलाई दबाब दिए ।

प्रहरीको अनुसन्धानका क्रममा कुकुरको छाउरोको हत्या गर्दै गरेको भिडियो इलामको रहेको खुल्यो । 

भिडियो इलामको पुष्टि भएपछि जिल्ला प्रहरी कार्यालय इलामका प्रमुख एसपी प्रभु ढकालले कुकुर मार्ने समूह र फेसबुकमार्फत पोष्ट गरेर भाइरल बनाउने युवाहरुको खोजीका लागि प्रहरी परिचालन गरे ।

भिडियो पोष्ट भएको तीन दिनपछि भने कुकुरको छाउरोलाई मार्ने तीन जनालाई प्रहरीले पक्राउ गरेको छ ।

कुकुरको छाउरो हत्यामा संलग्न इलाम देउमाई नगरपालिका–९ जितपुरका २१ वर्षीय दिक्षान्त मोरोहाङ लिम्बु, संगम लिम्बु र अशोक लिम्बुलाई प्रहरीले सोमबार पक्राउ गरेको हो ।

पक्राउ परेकामाथि पशुपंक्षी सम्बन्धी कसुरमा अनुसन्धान सुरु भएको एसपी ढकालले जानकारी दिए । 

प्रहरीको प्रारम्भीक अनुसन्धानका क्रममा पक्राउ परेका तीन जनामध्येकै युवाहरुले भिडियो पोष्ट गरेको खुलेको छ ।

एसपी ढकालका अनुसार तीनजना युवाहरुमध्ये नै कसैले कुकुरको छाउरो मार्दाको भिडियो खिचेको र भाइरल हुन उक्त भिडियो पनि उनीहरुले नै सामाजिक सञ्जालमा राखेको अनुसन्धानका क्रममा पाइएको छ ।

मुलुकी अपराध संहिता २०७५ अनुसार पुशपंक्षीलाई निर्ममता पूर्वक हत्या गर्नेलाई कानुनी सजायको व्यवस्था गरेको छ । यस्ता व्यक्तिलाई तीन महिना जेल सजाय र पाँच हजार जरिवाना हुने उल्लेख गरिएको छ ।