काठमाडौं । प्रमुख प्रतिपक्ष दल नेपाली कांग्रेसका नेता डा. शेखर कोइरालाले कांग्रेस मरिहत्ते गरेर सरकारमा जाने कुनै पनि तयारीमा नभएको बताएका छन् । उनले आफैँ सत्ता कांग्रेसको हातमा आए फरक कुरा भएको भन्दै उनले तत्काल सरकारमा जाने कुनै तयारी नभएको बताए । 

बुधबार राजधानी काठमाडौंमा नेपाल वित्तीय संस्था कर्मचारी संघ, नेपाल बैंक लिमिटेडको दशौँ केन्द्रीय महाधिवेशनको उद्घाटन कार्यक्रममा बोल्दै उनले कांग्रेस विपक्षमा बस्ने जानकारी दिए । “कांग्रेस सरकारमा जान्छ कि जाँदैन भनेर सोध्नुहुन्छ । हामीले विपक्षको भूमिका खेल्ने हो । सरकारमा जाने हतारो छैन,” उनले भने, “आउने भए त्यसै आउँछ । तर, कोसिस गरेर मरिहत्ते गरेर सरकारमा जाने छैनौँ ।” 

प्रतिनिधिसभा सदस्य समेत रहेका उनले ‘राजनीतिमा अपराधीकरण गम्भीर’ भएर गएको उल्लेख गरे । उनले राज्यको संयन्त्रले अनावश्यक दुख दिने गरेको भन्दै आपत्ति जनाए । “धेरै ठाउँमा अनावश्यक हिसाबले अख्तियारले, निर्वाचन आयोगले, सीआईबीले दुख दिइरहेको देख्नुभएकै छ । यो दुर्भाग्य हो र किन भइरहेको छ ? यो कुरा राजनीतिक दलहरूको बीचमा छलफल हुन जरुरी छ,” उनले भने । 

नेता कोइरालाले दल फुटाउने र व्यक्तिलाई दुख दिने काम गरेर अघि बढ्ने हो भने कही पनि पुग्न नसकिने बताए । साथै उनले, जबसम्म सुशासन र पारदर्शीका साथै भ्रष्टाचारको कुरा छिनोफानो गरेर अघि जान नसके देशमा आर्थिक विकास हुन नसक्ने बताए । “यो कुरालाई नेपाली कांग्रेसले गम्भीर विषय लिएको छ । अन्य दलसँग पनि छलफल अघि बढाइरहेको छौँ,” उनले भने । 

कार्यक्रमलाई सम्बोधन गर्दै उनले राजनीतिक स्थिरता र सरकरको स्थिरता कसरी छिनोफानो हुन्छ भनेर राजनीतिक दलहरू बीचमा छलफल अघि बढिरहेको जानकारी दिए । सरकार अस्थिर बनाउन निर्वाचन प्रणाली पनि कारक भएको भन्दै उनले भने, “यसका लागि संविधानमा केही सुधार र परिवर्तन गरेर अघि बढेर जान सक्यौँ भने मात्र देश अघि बढ्छ ।”