काठमाडौं । रुसी सेनामा भर्ती भएका दुई भारतीय नागरिक युक्रेनसँगको युद्धमा मारिएका छन् । भारतीय विदेश मन्त्रालयले विज्ञप्ति जारी गर्दै यो जानकारी दिएको हो । भारतीय विदेश मन्त्रालयले विज्ञप्तिमा भनेको छ, “हामी मृतकका परिवारप्रति गहिरो समवेदना व्यक्त गर्छौँ । मस्कोमा रहेको हाम्रो दूतावासले रुसी रक्षा मन्त्रालयलगायत रुसी अधिकारीहरूलाई शव जतिसक्दो चाँडो स्वदेश फिर्ता गर्न दबाब दिइरहेका छन् ।” 

भारतीय विदेश मन्त्रालयल र मस्कोमा रहेको भारतीय दूतावासले रुसी सेनामा सेवा गरिरहेका सबै भारतीय नागरिकहरूको चाँडो रिहाइ र फिर्ताको मुद्दालाई नयाँ दिल्लीस्थित रुसी राजदूत र मस्कोमा रुसी अधिकारीहरूसँग जोडदार रूपमा उठाएका छन् । 

भारतले रुसलाई कुनै पनि भारतीय नागरिकलाई रुसी सेनामा पूर्ण रूपमा प्रतिबन्ध लगाउन माग गरेको छ । भारतीय नागरिकको रुसी सेनामा भर्तीलाई भारतले दुई देशबीचको साझेदारीविपरीतको कार्य भनेको छ । 

भारतीय विदेश मन्त्रालयले सबै भारतीयलाई रुसमा रोजगारीका लागि थप सावधानी अपनाउन अपिल गरेको छ ।यसै वर्षको मार्चमा केही एजेन्टहरूले धेरै भारतीयलाई रुसमा जागिरको बहानामा पुर्‍याइ रुसी सेनामा भर्ती गरेको खुलेको थियो । 

रुसी सेनामा भर्ती भएकालाई युक्रेनसँगको युद्धमा लड्न जबरजस्ती पठाइएको भारतले दाबी गरेको छ ।