![सांसद झाको प्रश्न– टुक्रे बजेट माग्ने अनि संस्थागत सुधार खोज्ने ?](https://12khari.top/uploads/posts/manish-jha1-1718094285.jpg)
काठमाडौं । राष्ट्रिय स्वतन्त्र पार्टी (रास्वपा)का सांसद मनीष झाले ‘संस्थागत पुनर्संरचना कहिले गर्ने ?’ भन्दै प्रश्न गरेका छन् । पुरानै फाइल खोलेर ‘इडिट’ गरेर कहिलेसम्म बजेट ल्याउने भन्दै उनले यसरी संस्थागत सुधार नहुने टिप्पणी गरे ।
मंगलबार प्रतिनिधिसभा बैठकमा शिक्षा, विज्ञान तथा प्रविधि, श्रम, रोजगार तथा सामाजिक सुरक्षा र कृषि तथा पशुपन्छी विकास मन्त्रालयको बजेटमाथिको छलफलका क्रममा उनले यो निर्माणमा कठोर भएर सोच्नुपर्ने बेला आएको बताए । उनले ‘टुक्रे बजेट माग्ने अनि देशमा संस्थागत सुधार खोज्ने ?’ भन्दै सांसदहरू पनि सुध्रनुपर्नेमा जोड दिए ।
उनले बजेट निर्माण अभ्यास नै पुनरवलोकन गर्दै परिणामुखी बनाउन आवश्यक भएको औँल्याए । श्रम मन्त्रालय भन्नासाथ वैदेशिक रोजगारी मात्र सोचिएको उनले बताए ।
‘वैदेशिक रोजगारीमा सीपयुक्त मानिस कत्तिको पठाइँदै छ ?’ भन्दै उनले प्रश्न गरे । “श्रम हाम्रा लागि अभिशाप हो भन्ने सोँच्छौँ । तर, श्रम अवसर हो भनेर विश्व बनाउन हामीले योगदान गरेका छौँ भनेर हामीले गर्व गर्ने कि !,” उनले भने ।
माइग्रेसन र संकट मानव इतिहासको अंग भएको भन्दै उनले यसलाई व्यवस्थापन गर्नुपर्नेमा जोड दिए ।