![युवा फरवार्ड एन्ड्रिक चम्किँदा मेक्सिकोविरुद्ध ब्राजिलको रोमाञ्चक जित](https://12khari.top/uploads/posts/khel-1717903624.png)
काठमाडौं । युवा फरवार्ड एन्ड्रिकको निर्णायक गोलप्रेरित ब्राजिलले अन्तर्राष्ट्रिय मैत्रीपूर्ण फुटबलमा मेक्सिकोविरुद्ध ३–२ को रोमाञ्चक जित निकालेको छ ।
आइतबार बिहान अमेरिकाको टेक्सासस्थित काइल फिल्डमा भएको खेलमा ब्राजिललाई जित दिलाउन एन्ड्रियस पेरेरा, गाब्रियल मार्टिनेली र एन्ड्रिकल गोल गरे । मेक्सिकोका हुआन क्विनोनेस र गुयर्मो मार्टिनेजले गोल गरे पनि टिमको हार टार्न सकेनन् ।
खेलको पाँचौँ मिनेटमा पेरेराले गोल गरेपछि ब्राजिलले पहिलो हाफमा १–० को अग्रता बनाएको थियो । ५४औँ मिनेटमा मार्टिनेलीले गोल गर्दै ब्राजिलको अग्रता दोब्बर बनाए । ७३औँ मिनेटमा क्विनोनेसले गोल गर्दै मेक्सिकोको खेलमा फर्किने सम्भावना कायम राखेका थिए । इन्जुरी समयको तेस्रो मिनेटमा मार्टिनेजले गोल गर्दै मेक्सिकोलाई खेलमा फर्काएपछि खेलले रोमाञ्चक मोड लिएको थियो ।
तर, इन्जरी समयकै छैटौँ मिनेटमा १७ वर्षीय युवा फरवार्ड एन्ड्रिकले गोल गरेपछि पाँचपटकको विश्वकप विजेता ब्राजिलले रोमाञ्चक जित पक्का गरेको हो ।
कोपा अमेरिका–२०२४ अघि ब्राजिलले अब जुन १३ मा अमेरिकाविरुद्ध दोस्रो मैत्रीपूर्ण फुटबल खेल्ने तालिका छ । जुन २१ देखि सुरू हुने कोपा अमेरिकामा ब्राजिल समूह ‘डी’ मा छ । यो समूहमा ब्राजिलसँगै कोलम्बिया, पराग्वे र कोस्टा रिका छन् ।
यस्तै, मेक्सिको प्रतियोगिताको समूह ‘बी’ मा छ । यो समूहमा मेक्सिकोसँगै इक्वेडर, भेनेजुयला र जमैका छन् ।