नयाँ दिल्ली । भारतमा एन्डीए संसदीय दलको नेता भएपछि नरेन्द्र मोदीले गठबन्धनका सबै दलहरूप्रति आभार व्यक्त गरेका छन् । यसै अवसरमा उनले विपक्षी इन्डिया गठबन्धनमाथि प्रहार पनि गरेका छन् ।  

उनले भनेका छन्, “एन्डीए गठबन्धन भारतको सबैभन्दा सफल प्रि–पोल अलाइन्स हो । म हृदयदेखि नै सबैप्रति आभार व्यक्त गर्दछु । खुसीको कुरा छ कि मलाई यत्रो ठूलो समूहलाई स्वागत गर्ने अवसर प्राप्त भएको छ । जो साथीहरू विजय भएर आउनु भएको छ उहाँहरू सबै अभिवादनको अधिकारी हुनुहुन्छ ।’

उनले थपे, “२०१९ मा एक कुरामा जोड गरिएको थियो जुन विश्वास थियो । फेरि एक पटक तपाईंहरूले मलाई दायित्व दिइरहनु भएको छ । यसको मतलब यो हो कि हामी दुईबीच विश्वासको सेतु अटुट रहेको छ । यो अटुट सम्बन्ध विश्वासको मजबुत धरातलमा छ ।”

उनले विपक्षी दलप्रति निसाना साँध्दै यो एनडीएको महाविजय भएको बताएका छन् । भने, “म मान्छु कि २०२४ को लोकसभा निर्वाचनको नतिजा जुन छ दुनियाले यसलाई मानेको छ र मान्ने छ कि एनडीएको यो महाविजय हो । तपाईंले देख्नु भयो होला दुई दिन कसरी बिते, जस्तो कि म हारिसकेको छु । आफ्ना कार्यकर्ताको मनोबल बढाउनका लागि उनीहरूले यसरी बोल्नु परिरहेको छ  । प्रयास भइरहेको छ कि यो विजयलाई पराजयको छायाँमा डुबाएर राख्न सकियोस् । अनि त्यसलाई स्वीकार गरियोस् ।”

मन्त्रिमण्डल भागबन्डा कस्तो होला ?
भारतमा नवनिर्वाचित नेसनल डेमोक्रेटिक अलाइन्स (एनडीए)का सांसदहरूको बैठक शुक्रबार भएको हो । सो बैठकले प्रधानमन्त्री मोदीलाई एनडीए नेतामा सर्वसम्मत रूपमा चयन गरेको थियो ।  

सो बैठकमा तेलुगु देशम पार्टी (टीडीपी)का चन्द्रबाबु नायडू र जनता दल युनाइटेड (जेडीयू)का नेता नीतीश कुमार पनि सामेल थिए । ती दुवै प्रमुख साझेदार दलले मोदीको मन्त्रिपरिषद्‌मा राम्रो पोर्टफोलियो खोज्न सक्नेछन् । उनले आउँदो आइतबार प्रधानमन्त्रीका रूपमा शपथ लिँदै छन् । एनडीएका लोकसभाका कुल संख्यामध्ये २९३ सिटमा विजय हासिल गरेको छ ।  

स्रोतलाई उद्धृत गर्दै एनडीटीभीले जनाएअनुसार नायडूको पार्टीले संसद्को सभामुखदेखि विभिन्न पाँच वटा पोर्टफोलियो मन्त्रिपरिषद्‌मा खोजेको छ । त्यस्तै, नीतीश कुमारको पार्टीले दुई महत्त्वपूर्ण पोर्टफोलियो खोजेको छ । जसमा रेलवेज र ग्रामीण विकास हुन् । चन्द्रबाबु र नीतीश कुमार गठबन्धन मामिलामा खारिएका नेता मानिन्छन् ।

तर, भाजपाले क्याबिनेट कमिटी अन सेक्युरिटीअन्तर्गत पर्ने रक्षा, अर्थ, गृह तथा विदेश मन्त्रालय अरुलाई नदिने मनस्थिति बनाएको बुझिएको छ । यसैगरी भाजपाले पूर्वाधार, सडक र रेलवेसम्बन्धी पूर्वाधार विकाससँग जोडिएका मन्त्रालय पनि छोड्न चाहेको छैन । एजेन्सी