काठमाडौं । भारतीय लोकसभा निर्वाचनको मतगणना जारी छ । मतगणना मंगलबार बिहानबाट सुरू भएको हो ।भारतीय निर्वाचन आयोगका अनुसार मतगणनाको प्रारम्भिक नतिजाअनुसार भारतीय प्रधानमन्त्री नरेन्द्र मोदी प्रतिस्पर्धीभन्दा थोरै मतले अघि छन् । 

मोदीले यसपालि उत्तर प्रदेशको वाराणसीबाट उमेदवारी दिएका छन् । वाराणसीबाट उमेदवारी दिएको यो उनको तेस्रोपटक हो । पहिलोपटक मोदीले सन् २०१४ को लोकसभा निर्वाचनमा वाराणसीबाट उमेदवारी दिएका थिए । उक्त निर्वाचनमा उनले हाल दिल्लीका मुख्यमन्त्री अरविन्द केजरीवाललाई पराजित गरेका थिए । 

निर्वाचनमा खसेकोमध्ये ५६.३७ प्रतिशत मत मोदीले पाएका थिए । सन् २०१४ को निर्वाचनमा मोदीले पाँच लाख ८१ हजार २२ मत ल्याएर विजयी भएका थिए । सन् २०१९ मा भएको लोकसभा निर्वाचनमा मोदीले पुनः वाराणसीबाट उमेदावरी दिएका थिए । उक्त निर्वाचनमा उनले मत बढाएर ६३.६२ प्रतिशत प्राप्त गरेका थिए । 

सन् २०१४ को तुलनामा सन् २०१९ को निर्वाचनमा मोदीले एक लाखभन्दा बढी मत प्राप्त गरेका थिए । सन् २०१९ को लोकसभा निर्वाचनमा मोदी ६ लाख ७४ हजार ६६४ मत ल्याएर विजयी भएका थिए । भारतमा सन् २०२४ अप्रिल १९ देखि जुन १ सम्म विभिन्न चरणमा निर्वाचन भएको थियो । निर्वाचनमा करोडौं भारतीय जनताले मतदान गरेका थिए । निर्वाचनको मतगणना मंगलबार बिहानबाट सुरू भएको छ ।

भारतीय मिडियाका अनुसार भारतीय प्रधानमन्त्री मोदी थोरे मतान्तरले मात्र प्रतिस्पर्धी उमेदवार कांग्रेसका अजय रायभन्दा अगाडि छन् । अजयभन्दा मोदी ४९ हजार ८५९ मतले अगाडि छन् ।

सन् २०१४ को निर्वाचनमा भन्दा सन् २०१९ को चुनावमा बढी मत पाएका मोदीको मत यसपटक घट्ने वा बढ्ने हो धेरैले चासोका साथ हेरेका छन् । तर, प्रारम्भिक मतपरिणामले मोदीलाई आफ्नो साख जोगाउन हम्मेहम्मे पर्ने देखिन्छ ।