काठमाडौं । प्रमुख प्रतिपक्ष दल नेपाली कांग्रेसका सांसद डा. चन्द्रकान्त भण्डारीले काठमाडौं महानगरपालिकाका मेयर बालेन्द्र शाह (बालेन)को काममा अवरोध गर्न नहुने बताएका छन् । 

एमाले र अध्यक्ष केपी शर्मा ओलीले काठमाडौं को न्युरोडस्थित सडकपेटी विस्तार गर्न नदिएको आरोप लगाइरहेका बेला कांग्रेस सांसद भण्डारीले मेयर शाहलाई काम गर्ने कुरामा निरुत्साहित गर्न नहुने टिप्पणी गरेका हुन् । 

सोमबार संघीय संसद् भवन नयाँबानेश्वरमा सञ्चारकर्मीहरूको जिज्ञासाको जवाफ दिने क्रममा उनले मेयर शाहमा केही गरौँ भन्ने हुटहुटी रहेकाले काम गर्न दिनुपर्ने बताएका हुन् । सांसद भण्डारीले गिरीबन्धु टी–स्टेट प्रकरण छानबिन गरी दोषीमाथि कारबाही हुनुपर्ने पनि बताए ।

उनले भने, ‘गिरीबन्धु कसले गर्‍यो ? यो अनुसन्धानको विषय हो । गिरीबन्धुहरूको कारणले धेरै नेपालीहरू ठगिएका छन् । जसरी सहकारीमा ठगिएका छन् । यसको रकम छिटोभन्दा छिटो फिर्ता गरिनु पर्छ । र, गलत गर्नेलाई कारबाही पनि गर्नुपर्छ । दोस्रो कुरा जुन बालेनहरू नयाँ जेनेरेसन आएका छन् । उसलाई केही गरौँ भन्ने हुटहुटी छ । हामीले त्यो काम गर्न दिनुपर्छ ।

सांसद भण्डारीले आफू नयाँ पुस्तालाई काम गर्न दिनुपर्छ भन्ने पक्षमा रहेको बताए ।