काठमाडौं । प्रमुख प्रतिपक्ष दल नेपाली कांग्रेसका सांसद धनराज गुरुङले बजेटले निर्धारण गरेको १२ खर्ब ६० अर्ब राजस्व उठाउन गाह्रो छ भन्नुभन्दा पनि कसरी उठाउन सकिन्छ भनेर सकारात्मक व्याख्या र छलफल हुनुपर्ने बताएका छन् । 

सोमबारको प्रतिनिधिसभा बैठकमा आर्थिक वर्ष २०८१/०८२ को राजस्व र व्ययको वार्षिक अनुमान (बजेट)माथिको सामान्य छलफलमा बोल्दै उनले आफू कानुनमन्त्री हुँदैको बखत आगार्मी आर्थिक वर्षमा यति राजस्व उठाउने छलफल भएको बताए । गाँजा खोतीका विषयमा आफू कानुनमन्त्री हुँदै कानुन बनाउन पहल गरेको भन्दै उनले गाँजा खेती गरेर औषधिजन्य उत्पादन गर्नुपर्ने भन्दै गाँजा खेती बन्द गर्ने कार्य सय प्रतिशत गलत भएको उल्लेख गरे । “म मन्त्री बन्दा पटकपटक कानुन बनाएर ल्याउनुहोस् भन्दा ल्याउनुभएन । यदि कानुन बनाएर जाने हो भने गाँजा खेतीबाट दुई खर्ब राजस्व वृद्धि हुन्छ,” उनले भने । 

घरेलु मदिरासम्बन्धी कानुन बनाएर ब्रान्डिङ गर्न सके दुई खर्ब राजस्व उठ्ने भन्दै कानुन नबनाउने तर, हात फैलाउन भने तयार हुने भन्ने प्रश्न उनको थियो । जडिबुटीको खेतीको विषयमा पनि कानुन बनाउन सके राजस्व संकलन वृद्धि हुने उनको भनाइ थियो । यसबाट पनि थप दुई खर्ब राजस्व उठ्ने उनको दाबी थियो । “यदि यसरी जाने हो भने १२ होइन १९ खर्बभन्दा बढी राजस्व उठ्छ । हुँदैन भन्ने प्रवृत्ति अन्त्य गरौँ,” उनले भने । 

पूर्वकानुनमन्त्री समेत रहेका गुरुङले धार्मिक, सांस्कृतिक, खेलकुदलगायत पर्यटनको सम्भावना रहेको बताए । उनले जनकपुरमा विवाह हब, लुम्बिनीमा वर्थिङ हब बनाउने भए हनिमुन सिटी पनि थप गर्नुपर्ने उल्लेख गरे । “हनिमुन हबको कमी भयो । कही न कही बनाऊ । चितवनको सौराहालाई हनिमुन सिटी बनाऊ । चितवन, रारा ताल क्षेत्रमा बनाउन,” उनले भने ।

उनले 'नो नट अगेन भ्युटावर' अभियान नै चलाउनु पर्ने उल्लेख गरे । भिजन, मिसन र कमिट्मेन्ट लिडरमा चाहिने भन्दै १० प्रतिशत बढीको जीडीपीको बनाउन सकिने कुरा अघि सारे । “काठमाडौं–सगरमाथा चुम्बकीय रेलमार्ग किन नबनाउने ? असम्भव भन्ने हुँदैन,” उनले भने ।