काठमाडौं । प्रतिपक्ष दल राष्ट्रिय प्रजातन्त्र पार्टी (राप्रपा)का सांसद धवलशमशेर जबराले बजेटमा विद्युतीय सवारीसाधनमा भन्सारदर र भ्याट किन बढाएको भन्दै प्रश्न गरेका छन् ।

आइतबार प्रतिनिधिसभा बैठकमा आउँदो आर्थिक वर्षको बजेटमाथिको सैद्धान्तिक छलफलका क्रममा उनले ईभीको माग बढ्दा इन्धन खपत कम हुने भन्दै किन भ्याट बढाएको भनि प्रश्न गरेका हुन् ।

उनले अहिलेको बजेटले उठाउँछु भनेको राजस्व संकलन हुनेमा शंका व्यक्त गरे । बजेटले देशमा चलिआएको मन्दी सम्बोधन गर्ने आधार नदिएको उनले टिप्पणी गरे ।

कृषिमा बजेट किन घटाएको भन्दै उनले थप प्रश्न गरे । “स्टाअर्पको राम्रो कुरा आयो । यसले स्वरोजगार बढाउनेछ,” उनले भने ।

राप्रपाका महामन्त्री समेत रहेका उनले द्वन्द्वपीडितलाई व्यवस्थित गर्न ठूलो बजेट राखको भन्दै थपे, “यसमा आपत्ति हामीलाई छैन, तर पीडितको नाममा पार्टीका कार्यकर्ता पोस्ने काम गर्नु भएन । यसमा सचेत बनौँ ।”

आलु, प्याजको भ्याट घटाइए पनि यसले दीर्घकालमा असर गर्नेतर्फ जबराले ध्यानाकर्षण गराए ।

उनले भौतिक पूर्वाधारमा लगानी बढाइए पनि गौरवका आयोजनामा बजेट किन घटाइएको भन्दै प्रश्न गरे । “पुराना योजना अलपत्र छन्, नयाँ योजना सिर्जना गरेर पार लाग्ला ?,” उनले प्रश्न गरे ।