काठमाडौं । नेपाल चेम्बर अफ कमर्सका अध्यक्ष कमलेश अग्रवालले आउँदो आर्थिक वर्षको बजेट यथार्थपरक र संयमित रहेको बताएका छन् । बिहीबार काठमाडौंमा आयोजित एक कार्यक्रममा उनले यस्तो बताएका हुन् ।

कृषि, पर्यटनलगायत क्षेत्रमा राम्रा कार्यक्रम ल्याइनु सकारात्मक पक्ष भएको उनले उल्लेख गरे । अर्थतन्त्रलाई चलायमान बनाउन बजेटको कार्यान्वयन चुनौतीपूर्ण रहेको उनको भनाइ छ ।

उनले आन्तरिक राजस्वमा भने समस्या भएको बताए । भूतप्रभावी करको दायित्वको दबाब परिरहेकाले यसतर्फ ध्यान दिनुपर्नेमा उनले जोड दिए । यस्ता नीतिले व्यवसायी आतंकित भइरहेको अवस्थामा अर्थतन्त्र सुध्रन नसक्ने उनले टिप्पणी गरे ।

एकातर्फ स्रोत बढाउने लक्ष्य लिने तर आर्थिक शिथिलता ल्याउने बजेटका कारण तालमेल नमिल्ने उनले बताए । राज्यले मालवस्तुको मूल्यांकन गर्नेतर्फ जान नहुने उनको धारणा छ ।

आन्तरिक ऋण धेरै उठाउँदा बजारमा तरलता अभावको जोखिम पनि बढ्ने  उनले बताए । अनुत्पादक क्षेत्रको बजेट कटौती गरेर उत्पादन क्षेत्रमा विनियोजन गर्ने अभ्यास गर्नुपर्नेमा पनि उनले जोड दिए ।

६ प्रतिशतको आर्थिक वृद्धिको लक्ष्य सामान्य अवस्थामा कम भए पनि अर्थतन्त्र चलायमान बनाएर त्यो पूरा गर्न चुनौतीपूर्ण हुने उनले बताए । आर्थिक वृद्धिको उक्त लक्ष्य प्राप्ति गर्न निजी क्षेत्रतर्फको कर्जा प्रवाह १५ प्रतिशतसम्मले बढ्नुपर्ने उनको भनाइ छ ।

“अहिले कर्जा प्रवाह ५ प्रतिशत हाराहारीमा वृद्धि भएको छ । यो अवस्थामा आर्थिक वृद्धि धेरै हुँदैन । तसर्थ, लक्षित आर्थिक वृद्धि हासिल गर्न कर्जाको वृद्धिदर १५ प्रतिशतसम्म हुनुपर्छ । त्यसको लागि ब्याजदर कम हुनुपर्छ,” उनले भने । कर्जा प्रवाह बढाउन वित्तीय पहुँच बढाउने गरी मौद्रिक नीति ल्याइनुपर्ने उनले बताए ।

पुँजीगत खर्च गर्नमा उच्च प्राथमिकता दिइनुपर्ने उनले उल्लेख गरे । आउँदो आवलाई सूचना प्रविधिको दशक, आलुप्याजको मूल्य अभिवृद्धि कर हटाउने निर्णय लिइनु सकारात्मक भएको उनले बताए । विद्युत् प्रसारणलाइन र वितरणमा निजी क्षेत्रको सहभागिता गराउने उद्देश्य पनि राम्रो भएको उनको भनाइ छ ।

तर, विद्यत् व्यापारमा निजी क्षेत्रलाई खुला गर्ने नीति नल्याइनु दुःखद पक्ष भएको उनले बताए । आयकरको छुटको सीमा नबढाउनु पनि दुःखद पक्ष भएको उनले टिप्पणी गरे ।

विगतमा खेलकुद प्रयोजनमा गरिएको खर्च कर कार्यालयले मान्दै नमानेको अवस्थामा अहिले मान्ने नीति निकै राम्रो भएको उनले बताए । उनले निजी क्षेत्रप्रति अर्थमन्त्री एवम् सरकारले विश्वास गरेको भन्दै खुसी व्यक्त गरे ।