काठमाडौं । सरकारले आगामी आर्थिक वर्ष २०८१/०८२ का लागि आज बजेट प्रस्तुत गर्दै छ । आज दिउँसो १ बजे प्रतिनिधिसभा र राष्ट्रियसभाको संयुक्त बैठकमा बजेट प्रस्तुत गर्न लागिएको हो ।

अर्थमन्त्री वर्षमान पुनले आगामी आर्थिक वर्षका लागिा १९ खर्बको बजेट ल्याउने चर्चा छ । प्रत्येक वर्ष ठूलो आकारको बजेट ल्याइन्छ । तर, पुँजीगत खर्चको अवस्था जहिले निराशाजनक रहन्छ । चालु आर्थिक वर्षसहित विगत चार वर्षको बजेटको आकार र खर्च हेर्दा पनि पुँजीगत खर्च न्यून देखिन्छ । कुल बजेटको ठूलो हिस्सा चालु खर्चमा नै सकिने गरेको छ ।

चालु आर्थिक वर्ष २०८०/०८१ जेठ १४ गतेसम्म कुल बजेटको ६३.७२ प्रतिशत बजेट खर्च भएको छ । महालेखा नियन्त्रकको कार्यालयका अनुसार सरकारले चालु वर्षमा छुट्याएको १७ खर्ब ५१ अर्ब ३१ करोड रुपैयाँको करिब ६४ प्रतिशत खर्च भएको छ ।

जसमा चालुतर्फ सात खर्ब ८४ अर्ब ८८ करोड खर्च भएको छ । यो विनियोजन बजेटको ६८.८२ प्रतिशत हो ।

पुँजीगततर्फ विनियोजन गरिएको तीन खर्ब दुई अर्बमध्ये ४१.४१ प्रतिशत खर्च भएको छ ।

चार वर्षको बजेट र खर्च

चालु आर्थिका वर्ष २०८०/०८१ मा सरकारले १७ खर्ब ५१ अर्ब ३१ करोड रुपैयाँ विनियोजन गरेको छ । जेठ १४ गतेसम्म ११ खर्ब १५ अर्ब ९६ करोड रुपैयाँ खर्च भएको छ । यो विनियोजन बजेटको ६३.७२ प्रतिशत हो ।

त्यस्तै, आर्थिक वर्ष २०७९/८० मा १७ खर्ब ९६ अर्ब ८३ करोड रुपैयाँ बजेट विनियोजन गरिएको थियो । तर, खर्च १४ खर्ब २१ अर्ब ३२ करोड रुपैयाँ भएको थियो । यो कुल बजेटको ७९.२३ प्रतिशत हो । चालुतर्फ नौ खर्ब ९१ अर्ब ५० करोड रुपैयाँ खर्च भएको थियो । पुँजीगततर्फ दुई खर्ब ३४ अर्ब ६२ करोड रुपैयाँ खर्च भएको थियो ।

आर्थिक वर्ष २०७८/७९ मा १६ खर्ब ४७ अर्ब ५७ करोड रुपैयाँ बजेट विनियोजन गरिएको थियो । तर, १३ खर्ब १० अर्ब रुपैयाँ खर्च भएको थियो । यो कुल बजेटको ७९.५१ प्रतिशत हो । यो आर्थिक वर्षमा नौ खर्ब ५४ अर्ब ३१ करोड रुपैयाँ चालुतर्फ खर्च भएको थियो । पुँजीगततर्फ भने दुई खर्ब १६ अर्ब २१ करोड रुपैयाँ खर्च भएको थियो ।

आर्थिक वर्ष २०७७/०७८ मा १४ खर्ब ७४ अर्ब ६४ करोड रुपैयाँ बजेट विनियोज गरिएकोमा ११ खर्ब ९६ अर्ब ६७ करोड रुपैयाँ खर्च भएको थियो । यो कुल बजेटको ८१.१५ प्रतिशत हो । जसमा चालुतर्फ आठ खर्ब ४६ अर्ब २१ करोड रुपैयाँ खर्च भयो । पुँजीगततर्फ दुई खर्ब २८ अर्ब ८३ करोड रुपैयाँ खर्च भएको थियो ।