काठमाडौं । काठमाडौं उपत्यकासहित देशका धेरै स्थानमा आज दिनभर बदली (आकाशमा बादल) र वर्षाको सम्भावना छ । काठमाडौंसहित कतिपय स्थानमा अहिले पनि पानी परिरहेको छ ।

गए राति समेत देशका धेरै स्थानमा वर्षा भएको मौसम पूर्वानुमान महाशाखाले जनाएको छ । बंगालको खाडीमा विकसित ‘रेमल’ चक्रवातको अप्रत्यक्ष प्रभावसहितका कारण कोसी, मधेस, वाग्मती, गण्डकी प्रदेशका धेरै स्थानमा गए राति र आज बिहान वर्षा भएको महाशाखाका मौसमविद् सरोज पुडासैनीले जानकारी दिए ।

स्थानीय वायुसँगै ‘रेमल’ चक्रवातका कारण वर्षा भएको उनले स्पष्ट पारे । “गए राति/बिहान धेरै स्थानमा वर्षा भयो । विशेष गरेर स्थानीय वायु र पूर्वी भेगमा रेमल चक्रवातको सामान्य प्रभाव छ,” उनले बाह्रखरीसित भने, “गए राति त्यसको प्रभाव काठमाडौंसहित गण्डकीसम्म देखियो ।”

नेपालमा ‘रेमल’ चक्रवातको प्रत्यक्ष प्रभाव भने नपरेको उनले बताए । उक्त चक्रवातको प्रत्यक्ष प्रभाव बंगलादेश र भारतमा परेको उनले उल्लेख गरे । “ल्यान्डफल हुने ठाउँमा प्रत्यक्ष प्रभाव हुने हो । बंगलादेश र भारतमा ल्यान्डफल भएको हो,” उनले भने, “ल्यान्डफलमा धेरै वर्षा, चट्याङ, तीव्र हावाहुरी हुन्छ ।”

उनका अनुसार, त्यो ठूलो प्रणाली हो । त्यो प्रणाली फैलने भित्री घेरो क्षेत्रमा नेपाल पर्दैन । तर, त्यसको अप्रत्यक्ष प्रभाव यहाँ देखिएको छ ।

“त्यो ठूलो डायमिटर (व्यास)को छ । एक हजार किलोमिटरभन्दा बढीको छ,” उनले भने, “त्यसको बाहिरी घेरोको प्रभाव यहाँ देखिएको हो ।”

‘रेमल’को बाहिरी घेरोको प्रभावले नेपालमा बदली र वर्षा गराउन ‘सपोर्ट’ गरेको उनले बताए । “त्यसले (रेमल) बादल लेरायो । यहाँ स्थानीय वायुको प्रभाव छँदै छ,” मौसमविद् पुडासैनीले भने, “त्यसले वर्षा गराउन सपोर्ट गर्‍यो ।”

काठमाडौंमा आज दिउँसो र राति पनि वर्षाको सम्भावना रहेको उनले बताए । हल्कादेखि मध्यम वर्षाको सम्भावना रहेको उनले जानकारी दिए । 

काठमाडौंमा कतैकतै कुनै बेला घाम पनि लाग्न सक्ने उनको भनाइ छ । “काठमाडौंमा कतै पनि घाम नै नलाग्ने भन्ने सम्भावना त रहँदैन, तर सबैतिर धेरै बेर घाम लाग्ने नहुन सक्छ,” उनले भने, “दिनभर धेरैजसो बदली, दिउँसो र राति पनि वर्षाको सम्भावना देखिन्छ ।”

काठमाडौंमा भोलि दिउँसो पनि वर्षाको सम्भावना रहेको उनले बताए ।