नयाँ दिल्ली । भारतको आम आदमी पार्टीका नेता–कार्यकर्ता आइतबार प्रदर्शनसहित सत्तारूढ दल भारतीय जनता पार्टी (भाजपा)को कार्यालयतर्फ जाने क्रममा रोकिएका छन् । प्रहरीले भाजपा कार्यालय आसपासको क्षेत्रमा निषेधाज्ञासम्बन्धी सेक्सन १४४ प्रयोग गरिएको जनाएको छ ।

दिल्ली सेन्टरका डीसीपी हर्षवर्द्धन मान्डभले उनीहरू कार्यालयतर्फ आउने क्रममा आफूहरूले रोकेको जनाएका छन् । दिल्लीका मुख्यमन्त्री अरविन्द केजरीवालले आम आदमी पार्टीका सबै नेतालाई प्रधानमन्त्री नरेन्द्र मोदीले पक्राउ गर्न खोजेको आरोप लगाउँदै हिजो पार्टीका नेता–कार्यकर्तालाई लिएर भाजपाको हेडक्वार्टरमा जाने बताएका थिए ।

सोहीअनुसार आज आम आदमीको पार्टी कार्यालयमा कार्यकर्तालाई सम्बोधन गरेर उनी नेता–कार्यकर्तासहित भाजपाको हेडक्वार्टरतर्फ निस्केका थिए । उनले जानुअघि आफूहरूलाई पक्राउ गर्न चुनौती पनि दिएका थिए । आफूहरूले आधा घण्टा निषेधित क्षेत्रमा धर्ना दिने र भाजपाले पक्राउ गराउन नसके भाजपा हार्ने भन्दै उनले चुनौती दिएका थिए ।

आमा आदमी पार्टीका राज्यसभाका सांसद स्वाति मालीवालले आफूमाथि कुटपिट गरिएको आरोप लगाउँदै मुख्यमन्त्रीका निजी सचिव विभव कुमारविरुद्ध प्रहरीमा जाहेरी दिएपछि उनलाई शनिबार प्रहरीले पक्राउ गरेको थियो । आम आदमी पार्टीले त्यसको प्रतिवाद गरेको थियो ।

स्वातिले मुख्यमन्त्रीका निजी सचिवविरुद्ध भाजपाले सिकाएका आधारमा आरोप लगाएको आम आदमी पार्टीका नेताले आरोप लगाएका थिए । स्वातिले भने प्रहरीमा दिएको उजुरीमा आफूलाई विभव कुमारले गालामा थप्पडका साथै लात्तीले छातीमा हानेको आरोप लगाएकी थिइन् । यही सेरोफेरोमा आम आदमी पार्टीले आज भाजपा कार्यालयसम्म प्रदर्शन गरेको हो । बीबीसी हिन्दीबाट ।