काठमाडौं । सभामुख देवराज घिमिरेले प्रतिपक्षको वेल घेराउमा संसद्को प्रक्रिया अघि बढाएका छन् । सहकारीको रकम अपचलनमा गृहमन्त्रीको संलग्नतालाई लिएर प्रमुख प्रतिपक्षी दलले राखेको संसदीय छानबिन समिति गठन नभएपछि नेपाली कांग्रेसले संसद्को बैठक अवरोध गरेको थियो । 

आजको बैठक सुरु हुनासाथ कांग्रेसले वेल घेराउसहित नाराबाजी गरिरहेको छ । सभामुख घिमिरेले नाराबाजीमै राष्ट्रपति कार्यालयको पत्र पढ्दै कार्यसूचीमा प्रवेश गरेका हुन् ।

बुधबार नेकपा एमालेका अध्यक्ष केपी शर्मा ओलीले कांग्रेसको अवरोधले संसद् बन्धक बन्न नसक्ने भन्दै अब संसद्को बैठक सञ्चालन हुने बताएका थिए । सभामुख घिमिरेले आज अवरोधमै बैठक सञ्चालन गर्नुलाई नेपाली कांग्रेसका सांसद रामहरि खतिवडाले सभामुखले राजनीतिक दलको आवद्धतालाई कायम राखेको पुष्टि गरेको आरोप लगाए ।

आजको बैठकमा प्रसितपक्षी सबै दल वेलमा आएर नाराबाजी गरेका छन् । राष्ट्रिय प्रजातन्त्र पार्टीसहितका दलहरूले सभामुखलाई जबरजस्ती नगर्न चेतावनी दिँदै संसदीय मर्यादा कायम राख्न सभामुखलाई ध्यानाकर्षण गराए पनि सभामुख थर्काउने रणनीतिमा देखिएका छन् । उनले नाराबाजीको स्वर सानो भएको मौका पारेर बैठक सञ्चालन गरिरहेका छन् ।