सर्लाही । सर्लाहीको ईश्वरपुर नगरपालिकास्थित रामनगरमा करेन्ट लागेर एकजनाको मृत्यु भएको छ । एकजना गम्भीर घाइते छन् ।

करेन्ट लागेर ईश्वरपुर–९, रामनगर निवासी अन्दाजी २८ वर्षीया कुसुम देवीको मृत्यु भएको हो । उनका अन्दाजी ३४ वर्षीय श्रीमान् रम्भा महतोको पनि सोही घटनामा करेन्ट लागेर अवस्था गम्भीर बनेको छ । स्थानीय स्वास्थ्य संस्थामा उनको उपचार भइरहेको जिल्ला प्रहरी कार्यालयका प्रहरी नायब उपरीक्षक दीपक श्रेष्ठले जानकारी दिए ।

प्रहरीका अनुसार, शुक्रबार राति रम्भाको घरअगाडि ११ हजार भोल्टेजको विद्युतीय तारमा बेरिएको इन्टरनेटको तार चुँडिएर झरेको थियो । इन्टरनेटको तार उठाउन खोज्दा रम्भालाई करेन्ट लागेको प्रहरीले जनाएको छ ।

श्रीमान‍्लाई करेन्ट लागेको देखेपछि उनी हतारहतार बचाउन पुगेकी थिइन् । त्यसक्रममा कुसुमलाई पनि करेन्ट लागेको थियो ।

घटनालगत्तै स्थानीयले महतो दम्पतीलाई उपचारका निम्ति अस्पताल पुर्‍याएका थिए । उपचारका लागि कुसुमलाई सिद्धिविनायक अस्पताल पुर्‍याएपछि चिकित्सकले मृत घोषणा गरेका हुन् । श्रीमान् रम्भाको भने बयलबासस्थित अमृत हेल्थ केयरमा उपचार भइरहेको प्रहरीले जनाएको छ ।

मृतकको शव परीक्षणका लागि प्रदेशिक अस्पताल मलंगवामा राखिएको इलाका प्रहरी कार्यालय केश्वरगन्जका प्रहरी निरीक्षक मानप्रसाद श्रेष्ठले जानकारी दिए । घटनाका विषयमा थप अनुसन्धान भइरहेको प्रहरीले जनाएको छ । रासस