सिकागो । अमेरिकामा टिकट बुकिङ सिस्टममा गल्ती हुँदा १०१ वर्षीया बृद्धालाई बालिका सम्झिँदा समस्या झेल्नुपरेको छ । त्यो समस्या कसरी आयो भने अमेरिकी एयरलायन्स सिस्टमले उनको जन्म मिति सही ढंगले लिन सकेको थिएन । उनी सन् १९२२ मा जन्मेकी हुन् । तर, एयरलायन्सको सिस्टमले सन् २०२२ देखायो । 

प्याट्रिसिया नामकी ती बृद्धाले भनिन्,‘ ज्यादै रमाइलो भइरहेको छ । उनीहरूले मलाई सानो बच्चा ठान्दा रहेछन्, म एक वृद्धा महिला हुँ ।’ उनको टिकट रजिस्ट्ररमा सन् २०२२ देखिने हुँदा एयरलायन्सका कर्मचारीले उनी दुई वर्षीया बालिका भएको ठानेका थिए । गत वर्ष पनि उनलाई यस्तै भएको थियो । सानी बच्ची ठानिएकी यात्रु वृद्धा फेलापरेकी थिइन् ।

प्याट्रिसिया पछिल्लो पटक सिकागोबाट मिचिगनको मर्केटमा उडान गर्ने क्रममा यस्तै घटना भएको थियो । जहाँ बीबीसीका रिपोर्टर पनि थिए । प्याट्रिसिया उनकी छोरी क्रिससँग उडान गरिरहेकी थिइन् ।

“मेरी छोरीले टिकटको रिजर्भेसन अनलाइनबाट गरेकी थिइन् । एयरपोर्टको कम्प्युटरले मेरो जन्म १९२२ मा हुनुपर्नेमा २०२२ मा भएको दर्ता गरे छ,” प्याट्रिसियाले भनिन् । प्याट्रिसियाको सिट भने एडल्ट सिटको रूपमा दर्ता थियो । एयरपोर्टका कम्प्युटरले त्यति अघिको जन्ममितिलाई समेट्न नसक्ने भएकोले यस्तो समस्या आएको बताइएको छ । 

पूर्वनर्स रहेकी प्याट्रिसिया हरेक वर्ष जाडो छल्न र परिवार भेट्न लागि विमानबाट विभिन्न स्थानमा जाने गरेकी छन् । उमेरको अन्यौलका बाबजुद अमेरिकी एयरलायन्सका स्टाफले उडानमा आफूलाई मद्दत गर्ने गरेको उनी बताउँछिन् । 

अमेरिकी एयरलाइन्सले यसबारेमा टिप्पणी गर्न आग्रह गर्दा कुनै प्रतिक्रिया जनाएन । यस्तो समस्याले गर्दा विमानस्थलका कर्मचारी उनलाई टर्मिनलसम्मको यातायातका लागि तयार रहने गरेका छैनन् । किनकि, उनीहरूले वृद्धालाई दुई वर्षकी बालिका ठान्ने गरेका छन् । त्यस्तै वृद्धालाई लैजान प्रयोग गरिने ह्विल चेयरको पनि पहिल्यै तयारी गरिएको हुँदैन । प्याट्रिसिया ९७ वर्षको हुन्जेल एक्लै विमानमा यात्रा गर्ने गरेकोमा त्यसपछि भने परिवारको सहयोगमा यात्रा गर्दै आएकी छन्  । 

आउँदो शरद ऋतुमा उनी फेरि विमानबाट यात्रा गर्ने योजनामा छन् । त्यतिबेला आफू १०२ वर्षको हुने भएकोले सायद विमानस्थलको कम्प्युटरले त्यस्तो गल्ती नगर्ने उनको आशा छ । बीबीसी