काठमाडौं । अर्थमन्त्री वर्षमान पुनले लगानीअनुकूल वातावरण बनाउन राजनीतिक सहमतिमा आधारमा अध्यादेश ल्याइएको बताएका छन् । सोमबार काठमाडौंमा आयोजित एक अन्तरक्रियामा उनले अध्यादेशप्रति कसैको विमति नरहेको उल्लेख गरे ।

लगानी प्रतिकूल ठानिएका कानुनका विभिन्न प्रावधान संशोधनका निम्ति सोमबार मन्त्रिपरिषद्को बैठकबाट अध्यादेश ल्याउने निर्णय गरिएको थियो । लगानी सम्मेलन सरकार वा सत्तापक्षमा रहेका राजनीतिक दलको मात्र नभई नेपालको भएको मन्त्री पुनको भनाइ थियो ।

“नेपालमा वैदेशिक लगानी ल्याउनुपर्छ र मुलुकको विकास गर्नुपर्छ भन्नेमा सत्तामा र सत्ताबाहिर रहेका कसैको पनि असहमति वा विरोध छैन,” उनले भने, “लगानी सम्मेलन सरकारको वा सत्तापक्षमा भएका दलहरूको मात्र होइन, प्रतिपक्षको पनि हो र यो नेपालको हो । सम्मेलनको उद्घाटनदेखि समापनसम्म सबै राजनीतिक दलको अनुहार देखिने गरी कार्यक्रम बनाएका छौँ ।”

पहिलो र दोस्रो लगानी सम्मेलनमा आएका लगानीकर्ता तेस्रो सम्मेलनका निम्ति पनि उत्साहित रहेको आफूले पाएको उनले सुनाए । ठूलो संख्यामा वैदेशिक लगानी भित्रने उनले विश्वास व्यक्त गरे ।

“पुँजीको प्रवृत्ति भनेकै बजार र नाफा हो,” उनले भने, “सरकारमा समाजवादी वा पुँजीवादी अनुहारको व्यक्ति छ भन्ने कुरामा लगानी निर्भर गर्दैन । वाद र विचारधाराभन्दा अहिले मानिसले बजार र नाफा हेरेर लगानी गर्ने अवस्था छ ।”

सरकारले आन्तरिक लगानीकर्ता र उद्यमीलाई समेत प्रेरित गर्ने र उनीहरूको मनोबल बढाउने काम गरिरहेको मन्त्री पुनले बताए ।