काठमाडौं । नेपाल समाजवादी पार्टीका सहअध्यक्ष तथा वाग्मती प्रदेश सरकारका आन्तरिक मामिला तथा कानुनमन्त्री गंगानारायण श्रेष्ठले नेकपा (माओवादी केन्द्र) कसरी दुस्मन शक्ति भयो भनी अध्यक्ष डा. बाबुराम भट्टराईलाई प्रश्न गरेका छन् । शनिबार ललितपुरमा आयोजित पार्टीको अगुवा कार्यकर्ता भेला तथा अभिमुखीकरण कार्यक्रममा उनले यस्तो प्रश्न गरेका हुन् ।

उनले गत निर्वाचनअगाडि नै माओवादी केन्द्रसँग चुनावपछि एकता गरेर जाने सहमति गरेको सुनाए । तर, अध्यक्ष भट्टराई एकता गर्ने पक्षमा नउभिएको भन्दै उनले यसले आफूहरूलाई आश्चर्य बनाएको बताए ।

उनले माओवादी केन्द्रको आठौँ राष्ट्रिय महाधिवेशनले पारित गरेको दस्ताबेजका आधारमा नेसपाको नजिकको राजनीतिक शक्ति माओवादी केन्द्र नै भएको उल्लेख गरे । उनले विगतमा डा. भट्टराईका निम्ति माओवादी केन्द्रको सो दस्तावेज क्रान्तिकारी भएको बताए । आज सोही दस्ताबेज अवलम्बन गरिरहेको माओवादी केन्द्र कसरी दुस्मन शक्ति भयो भनी उनले प्रश्न गरे ।

उनले डा. भट्टराईले राजनीतिक इमानदारिता नदेखाएको पनि बताए । “...मन पर्दाखेरि सबै कुराहरू सुगन्ध आउने, मन नपर्न थालेपछि सबै कुराहरू दुर्गन्ध आउने हुन्छ ? त्यो राजनीतिक इमानदारिता हो ? राजनीतिक इमानदारिता होइन,” उनले भने ।

डा. भट्टराईले नै अग्रगामी शक्तिका बीचमा एकताको विषय उठाएको भन्दै उनले माओवादी केन्द्रसँगको एकताबाट भाग्न नपाउने बताए । आफूहरूलाई आरोपित गरेर डा. भट्टराई ‘पानीमाथिको ओभानो’ बन्न नसक्ने उनको भनाइ थियो ।

माओवादी केन्द्रसँगको पार्टी एकता ऐतिहासिक आवश्यकता भएको उनले बताए । उनले पार्टी एकताको विकल्प नभएको जिकिर गरे ।

सहअध्यक्ष श्रेष्ठले डा. भट्टराई विचलनमा परेको भन्दै त्यसले कुनै निष्कर्षमा पुर्‍याउन नसक्ने बताए । उनले भट्टराईलाई आफ्नो पक्षमा बहुमत पार्टी सदस्य जुटाएर देखाउन चुनौती समेत दिए । न्युज एजेन्सी नेपाल