काठमाडौं । सन् २०२४ को पहिलो त्रैमासमा चिनियाँ ब्रान्ड साओमी र ट्रान्सिनले आक्रामक बजार लिँदा एप्पलको व्यापार खस्किएको छ ।

इन्टरनेसनल डाटा कर्पोरेसन (आईडीसी)को रिपोर्टअनुसार, एप्पलले पहिलो त्रैमासमा पाँच करोड १० लाख फोन डेलिभर गरेको छ । यो संख्या अघिल्लो वर्षको यसै अवधिको पाँच करोड ५४ लाखको तुलनामा ९.६ प्रतिशतले कम हो ।

सामसङले गत वर्षकै बराबर लगभग ६ करोड १० लाख फोन ढुवानी गर्दै पहिलो नम्बरमा स्थान बनाएको छ । सामसङको बजार हिस्सा २०.८ प्रतिशत छ ।

एप्पलको बजार हिस्सा गत वर्ष २०.७ प्रतिशतका साथ शीर्ष स्थानमा थियो । यसको बजार हिस्सा अहिले १७.३ प्रतिशतमा झरेको छ ।

साओमीले गत वर्षको तुलनामा ३३.८ प्रतिशतभन्दा बढी चार करोड ८० लाख फोन ढुवानी गरेको छ । यसको बजार हिस्सा १४.१ प्रतिशत छ ।

यस्तै, टेक्नो, आइटेल, इन्फिनिक्स ब्रान्डका फोन उत्पादन गर्ने ट्रान्सिनले गत वर्षको तुलनामा ८४.९ प्रतिशतभन्दा बढी दुई करोड ८५ लाख फोन ढुवानी गरेको छ । ट्रान्सिनको बजार हिस्सा ९.९ प्रतिशत पुगेको छ ।

अर्काे चिनियाँ ब्रान्ड ओप्पोले गत वर्षको तुलनामा ८.५ प्रतिशत कम दुई करोड ५२ लाख फोन ढुवानी गरेको छ । ओप्पोको बजार हिस्सा ८.७ प्रतिशतमा झरेको छ ।

विश्वभर यो वर्ष मोबाइलको ढुवानी ७.८ प्रतिशतले बढेर २८ करोड ९४ लाख पुगेको छ ।