दमौली । नेपाल कम्युनिस्ट पार्टी (एमाले)का उपमहासचिव प्रदीप ज्ञवालीले आफ्नो पार्टीले जनताका मुद्दा सम्बोधन गर्ने बताएका छन् । एमाले व्यास नगर कमिटीले नयाँ वर्षका अवसरमा शनिबार तनहुँमा आयोजना गरेको शुभकामना आदानप्रदानमा उनले एमाले सधैँ जनताका पक्षमा रहेको र उनीहरूका मुद्दालाई प्राथमिकता दिँदै आएको बताएका हुन् ।

उपमहासचिव ज्ञवालीले देशमा एमाले नै सकियो कि भन्ने भाष्य बनाइएको उल्लेख गरे । उनले भने, “विगतमा सरकारमा रहेर विपक्षी दल एमालेलाई देशमा नै एमालेको अस्तित्व सकियो भन्ने प्रोपगान्डा चलाइएको थियो । तर, त्यो सम्भव थिएन र भएन ।”

एमाले जनताको प्रिय पार्टी भएकाले सिध्याउन सम्भव नभएको उनले बताए । वर्तमान राजनीतिक कोर्षलाई सही दिशामा ल्याउन एमालेको भूमिका रहेको उनले उल्लेख गरे ।

उनले भने, “सरकारको मुख्य उद्देश्य भनेको राजनीतिक स्थिरता हो, जसले सुशासन र विश्वास सिर्जना गर्दछ । देशको अर्थतन्त्र सुदृढ बनाउन अहिलेको सरकार लागिपरेको छ ।”

घेराबन्दीका बाबजुद पनि एमाले देशको प्रमुख शक्ति भएको उनले बताए । एमालेले मात्र देशको विकास र समृद्धि ल्याउने उनको भनाइ थियो ।

भ्रष्टाचारविरुद्धको लडाइँमा कुनै पक्षपात नगरिने हुँदा अब देश निर्माणमा सम्पूर्ण राजनीतिक शक्ति एकजुट हुनुपर्नेमा ज्ञवालीले जोड दिए । रासस