काठमाडौं । सुदूरपश्चिम प्रदेशमा नागरिक उन्मुक्ति पार्टीको नेतृत्वमा सरकार बनाइने निश्चितजस्तै भएको छ । शुक्रबार (भोलि) बनाइने नयाँ सरकारको नेतृत्व मुख्यमन्त्रीका रूपमा कैलाश चौधरीले गर्ने नागरिक उन्मुक्ति पार्टीकी अध्यक्ष रन्जीता श्रेष्ठले बताइन् ।

त्यसबाहेक नागरिक उन्मुक्तिले थप एक मन्त्री र एक राज्यमन्त्री पाउने सहमति भएको उनले जानकारी दिइन् । प्रधानमन्त्री पुष्पकमल दाहाल ‘प्रचण्ड’, नेकपा (एमाले)का अध्यक्ष केपी शर्मा ओली, नेकपा (एकीकृत समाजवादी)का अध्यक्ष माधवकुमार नेपाल र जनता समाजवादी पार्टी (जसपा)का अध्यक्ष उपेन्द्र यादवसहितको बुधबार बसेको बैठकमा सुदूरपश्चिम प्रदेश सरकारको नेतृत्व नागरिक उन्मुक्तिलाई दिने सहमति भएको उनले बताइन् ।

त्यसलगत्तै नागरिक उन्मुक्तिले मुख्यमन्त्रीमा चौधरीका नाममा निर्णय गरेको अध्यक्ष श्रेष्ठले जानकारी दिइन् । “नयाँ वर्षमा सुदूरपश्चिम प्रदेशमा नागरिक उन्मुक्तिको नेतृत्वमा नयाँ सरकार बन्छ,” उनले बाह्रखरीसँग भनिन्, “भोलि  (शुक्रबार) कैलाशजी मुख्यमन्त्री बन्दै हुनुहुन्छ । नागरिक उन्मुक्तिको नयाँ सरकार बन्ने खुसीमा सामेल हुन म पनि सुदूरपश्चिम पुग्दै छु ।”

पार्टीमा केही समय देखिएको मतभेद पनि टुंगिसकेको उनको भनाइ छ । “सुदूरपश्चिमका हाम्रा प्रदेश सांसदहरू सबै एकै ठाउँ बसेर पार्टी एक ढिक्का भएको सन्देश दिइसक्नुभएको छ । म भने हिजो (बुधबार)को बैठकमा सहभागी हुन पाइनँ,” उनले भनिन्, “नयाँ वर्षमा (यो पक्ष, ऊ पक्ष भन्ने छैन) सिंगो नागरिक उन्मुक्ति पार्टी परिवारमा खुसी छाउनेछ ।”

नागरिक उन्मुक्तिले राज्यमन्त्रीसहित पाउने अर्को मन्त्रालयका विषयमा भने टुंगो लागिनसकेको उनले बताइन् । “हामीले त भौतिक मन्त्रालय भनेका छौँ, हेरौँ, त्यही हुन्छ हुँदैन,” श्रेष्ठले भनिन् ।

सो पार्टीका नेता राजेश अधिकारीले बुधबार प्रधानमन्त्रीको सरकारी निवास बालुवाटारमा बसेको बैठकबाट नागरिक उन्मुक्तिलाई मुख्यमन्त्रीको उमेदवार तय गर्न आग्रह गरिएको जानकारी दिए । त्यसपछिको बैठकमा नागरिक उन्मुक्तिले मुख्यमन्त्रीमा चौधरीको नाम समेत प्रस्ताव गरिसकेको उनले बताए ।