पोखरा । पोखरामा आइतबार अनेक राजनीतिक घटनाक्रम भए । एउटा मुख्यमन्त्रीको पद गयो, अर्का मुख्यमन्त्री नियुक्त भए ।
गण्डकीको यो राजनीतिक घटनाक्रम चर्चाको विषय बनेको छ । आइतबार बिहानसम्म मुख्यमन्त्री रहेका सुरेन्द्रराज पाण्डे प्रतिपक्षमा पुगेका छन् ।
एमाले–माओवादी गठबन्धनबाट सभामुखलाई समेत गणना गरेर मुख्यमन्त्रीमा खगराज अधिकारीले दाबी गरे । त्यो थाहा पाउनासाथ नेपाली कांग्रेस उनको दाबी असंवैधानिक रहेको बताउँदै असहमतिको पत्र लिएर प्रदेश प्रमुख डिल्लिराज भट्टसमक्ष पुगे ।
पत्र दर्ता गराएपछि परिचय गरेर प्रदेश प्रमुखले उनीहरूलाई फिर्ता पठाए । त्यसको केहीबेरमा भट्टले अधिकारीलाई मुख्यमन्त्री नियुक्त गरे । त्यसविरुद्ध कांग्रेसले सर्वोच्च अदालत जाने चेतावनी दियो ।
मुख्यमन्त्री कार्यालयबाट पाण्डे बाहिरिए, अधिकारीले पदभार ग्रहण गरे ।
आफूले पनि मुख्यमन्त्रीमा दाबी गर्ने तयारी पाण्डेको थियो । सरकार गठनका लागि प्रदेश प्रमुखले २७ गते दिउँसो ३ बजेसम्मको समय दिएका थिए ।
तर, कांग्रेसले सरकारमा दाबी गर्न नपाउँदै एमाले–माओवादी गठबन्धनका अधिकारीलाई भट्टले मुख्यमन्त्री नियुक्त गरिदिए ।
अचानक मुख्यमन्त्री खोसिएको झोक र नियुक्ति प्रक्रिया असंवैधानिक भन्दै सर्वोच्चमा रिट हाल्न काठमाडौं जान भनेर पाण्डेले आइतबार साँझको टिकट लिए ।
यता, मुख्यमन्त्री नियुक्त भएर पदभार ग्रहण गरिसकेपछिको राजनीतिक अवस्थाको ब्रिफिङ गर्न मुख्यमन्त्री खगराज अधिकारी पनि काठमाडौं जाने तय भयो । उनले पनि आइतबार साँझको टिकट लिए ।
संयोगवश विमानस्थलमा वर्तमान र निवर्तमान मुख्यमन्त्रीको भेट भीआईपी कक्षमा भयो । दुवैले एउटै जहाजको टिकट लिएका रहेछन् ।
भिन्न परिस्थिति तर एउटै विषयले काठमाडौं हिँडेका पाण्डेले विमानस्थलमा भेटिएका मुख्यमन्त्री अधिकारीलाई जन्मदिनको शुभकामना दिइ । आजै मुख्यमन्त्री नियुक्त भएका अधिकारीको जन्मदिन पनि आज नै हो ।
