काठमाडौं । संयुक्त राज्य अमेरिकामा नेपाली कराते खेलाडी एरिका गुरुङ र राष्ट्रिय टिमका प्रशिक्षक कुशल श्रेष्ठ सम्मानित भएका छन् । 

यूएस ओपन च्याम्पियनसिपमा सहभागी हुन अमेरिका गएका गुरुङ र १०औँ साग गेमका गोल्डमेडलिस्ट समेत रहेका प्रशिक्षक श्रेष्ठलाई मोमो हाउस ह्युस्टनले एक हजार ५०० डलरसहित बिहीबार सम्मान गरेको हो । सम्मान कार्यक्रममा टेक्सासको ह्युस्टनमा बस्ने नेपालीको उपस्थिति थियो । एरिकाले १९औँ एसियाली खेलकुदमा ऐतिहासिक रजत पदक जितेकी थिइन् ।

गत २८ मार्चदेखि अप्रिल १ सम्म अमेरिकाको टेक्सासमा भएको उक्त प्रतियोगितामा एरिकाले १८ देखि २० वर्ष उमेर समूहमा स्वर्ण र ६८ केजी तौल समूहमा रजत पदक हात पारेकी थिइन् ।

यो प्रतियोगिताले आगामी खेलकुदलाई थप सहयोग पुग्ने प्रशिक्षक श्रेष्ठले बताए । जुलाईमा भुटानमा हुने आठौँ साउथ एसियन कराते च्याम्पियनसिप प्रतियोगितालाई पनि सहयोग पुग्ने विश्वास प्रशिक्षक श्रेष्ठको छ । उनका अनुसार अमेरिका गएको कराते टोली अप्रिल ९ मा काठमाडौं फर्किने छन् ।