काठमाडौं । आगामी वैशाख १५ गते हुने तय भएको उपनिर्वाचनका लागि यही चैत २४ गते उमेदवारको मनोनयनपत्र दर्ता गरिँदै छ । जसका लागि नेपाली कांग्रेसबाहेक लगभग सबै शीर्ष दलहरूले उमेदवारको टुंगो लगाइसकेका छन् ।

प्रतिस्पर्धी अरू दलका उमेदवारहरू घरदैलो अभियानमा गइरहँदा कांग्रेसले भने अझै उमेदवारको टुंगो लगाउन सकेको छैन । बरु उमेदवार चयनलाई लिएर पार्टीमा विवाद देखिएको छ ।

मंगलबार पार्टी सभापति शेरबहादुर देउवा निवास बूढानीलकण्ठमा बसे‍को बैठकमा नेताहरूबीच 'नोकझोक'कै स्थिति सिर्जना भएको छ । पार्टीको संस्थापन पक्ष र संस्थापन इतर पक्षले उमेदवारको विषयमा आआफ्नै दाबी राखेपछि मंगलबार कुनै सहमति हुन सकेन । नेताहरू शेखर कोइराला, शशांक कोइरालासहितले बैठक बहिस्कार गरेपछि अर्को बैठक बुधबार बस्ने तय भएको छ ।

बैठकमा सहभागी एक नेताका अनुसार पार्टी सभापति देउवा र उपसभापति पूर्णबहादुर खड्काले इलाम–२ मा डम्बर खड्कालाई उमेदवार बनाउने प्रस्ताव गरेका थिए । तर, अर्को पक्षले उनीहरूको प्रस्तावलाई सिधै खारेज गर्‍यो ।

संस्थापन इतर समूहका नेताहरू कोइराला, महामन्त्री गगन थापा, समहामन्त्रीद्वय जीवन परियार र बद्री पाण्डे भेषराज आचार्यको पक्षमा उभिए । संगठन र कार्यकर्तामा आचार्यको पकड बलियो रहेको तर्क उनीहरूको थियो ।

बैठकमा सहभागी एक नेताका अनुसार सुरुमा महामन्त्री थापाले सभापति र उपसभापतिसँग छलफल गरेका थिए । तर, उनीहरूले अडान नछाडेपछि थापाले शेखरलाई देउवा र खड्कासँग संवाद गर्न आग्रह गरेका थिए ।

त्यसपछि कोइरालाले स्थानीयको सुझाव छाडेर निकटताका आधारमा निर्णय लिए चुनावी परिणामको जिम्मेवारी लिनुपर्ने चुनौती दिएका थिए । स्थानीयको चाहनालाई बेवास्ता गरेर लिइने निर्णयले पार्टीलाई दुर्घटनामा पुर्‍याउने चेतावनी उनको थियो ।

“इलामको सवालमा सबैले भेषराजले जित्छ भन्दै छन् । तपाईं किन बुझ्नुहुन्न ? भेषराजलाई टिकट दिनुभयो भने ठिक छ, होइन भने जित हारको जिम्मा तपाईं नै लिनुस्,” शेखरको भनाइ उद्धृत गर्दै बैठकमा सहभागी एक नेताले भने ।

शेखरको भनाइमा पूर्वमहामन्त्री शशांक कोइरालाले पनि समर्थन जनाए । “शेखर दाइले भनेको कुरामा मेरो पनि सहमति हो,” यति भनेर दुवै नेता बैठक कक्षबाट बाहिरिएका थिए ।

देउवाले भने निरन्तर खड्का गएको निर्वाचनमा ११४ मतले मात्र पराजित भएको तर्क गरेका थिए । ०७९ को निर्वाचनमा स्वर्गीय सुवास नेम्वाङ ३० हजार २० मत ल्याएर निर्वाचित भएका थिए । उनका प्रतिस्पर्धी खड्काले २९ हजार ९०६ मत ल्याएका थिए ।

तर, देउवाको तर्कसँग इतर पक्षका नेताहरू सहमत भएनन् । बरु इतर पक्षलाई अर्का महामन्त्री विश्वप्रकाश शर्मा र सहमहामन्त्री भिष्मराज आङ्देम्बेले साथ दिए ।

एक नेताको भनाइमा त्यसपछि मात्र सभापति देउवा र उपसभापति खड्काले भने, "डम्बर मान्दैनन् । कसरी मनाउने ?"

उसो त बझाङको प्रदेशसभा उमेदवारको विषयमा पनि कांग्रेसमा विमति देखिएको छ । आजकै बैठकमा पार्टीको निर्णयविपरीत बझाङमा टिकट दिन लागिएको भन्दै शेखरले असहमति जनाएका थिए ।

“पार्टीले निर्णय गरेको छ । हारेको व्यक्तिलाई टिकेट नदिने भनेर,” नेता शेखरको भनाइ उद्धृत गर्दै ती नेताले भने, “फेरि तपाईंहरू हारेकोलाई बझाङमा टिकट दिन खोज्दै हुनुहुन्छ । के गर्न खोजेको ?”

मंगलबार कुनै सहमति हुन नसकेपछि बुधबारका लागि बैठक बोलाइएको छ । बुधबार दिउँसो २ बजे संसदीय बोर्डको र अपराह्न ४ बजे कार्यसम्पादन समितिको बैठक बोलाइएको प्रचार विभाग प्रमुख मीन विश्वकर्माले जानकारी दिए ।

प्रतिनिधिसभाअन्तर्गत इलाम क्षेत्र नम्बर–२ र प्रदेशसभातर्फ बझाङ–१ ‘क’ मा आउँदो वैशाख १५ गते उपनिर्वाचन हुँदै छ । संविधानसभाका अध्यक्षसमेत रहेका सुवास नेम्वाङको निधन भएपछि इलाममा उपनिर्वाचन हुन लागेको हो ।